2013-05-28

المولد زحمه كتير وعيال لابسه الطراطير


بصراحه موضوع انك تفكر دايما رأي الناس فيك ايه؟ بيدوش اللي مابيدوش ،وبيخليك تنسي ساعات انت كنت عايز تعمل ايه ،ويمر عليك الوقت والزمن، وتقول لنفسك بعد عمر انا ليه ماعملتش كده او كده ،ليه ماحققتش اللي انا كنت عايز اعمله ،وكتر خير المجتمع بتاعنا بصراحه لكلمه (عيب) الف حساب وحساب مع الكبير والصغير مع الرجاله والستات بس بصراحه الرجاله لغوها من زمان وقالك ده راجل يعمل اللي هو عايزه انما انتي ست (شيلاه يا ست ) يعني عامل المجتمع  الواجب مع الستات وشويه،بيقولك ان الستات في المجتمعات الشرقيه اكثر عرضه للامراض الخطيره ،لان دايما متوقع منها  العقل من جانبها لحد ما يوصلها لمستشفي المجانين من جانبها بردوا ،سيبك كونها مستحمله شطحات الرجل وهفواته ،وجنان العيال وشقاوتهم ،وغلاسه الحماه وبنتها ،ومعاكسات الرجاله العسل في الشارع وفي الشغل ،اللي محتاجين كمامه مش علي بقهم بس وعلي عنيهم وياريت علي جتتهم كلها علشان نخلص ،لا كمان علي تصرفاتها ماتعليش صوتك ،ماتزعقيش للعيال بصوت عالي ،مالك كده مكشره علي طول ،وهكذا....وطبعا لما تيجي تشتكي لست زيها تلاقي نصايح مالهاش اول من آخر وتلاقي مشكل اقتراحات وحلول علي اطباق من هوا اللي بطير معاها وهي ماشيه والحصيله ان النصايح دي ما هي الا عمود حديد أُضيف الي اعمده سجنها ،وماهي الا محطه من محطات الراديو المشوشه التي وضعت علي تردد خاطئ في عقل المرأه.
وستظل المرأه في صورتها الكارتونيه المكرره ،تمسك يد ابنها ذو الخمس سنوات بداخل الملاهي ،وبخلفها زوجها وهو يحمل ابنتهم ذات السنتين ،و تنظر لأمرأه اجمل منها واصغر ،وتقول في عقلها انها احلي منها، ثم تمر علي زوجها نفس المرأه ويقول الرجل في عقله لو بس اعرفها يومين دي، يادي الحظ.....
(يعني نسيتي مشاكلك كلها ومشكلتك بس انت احلي ولا غاده عبد الرازق!!!!
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

لا يعجبني الرجل الذي يجلس في كافي شوب ،مع بنت وهو فارد زراعيه علي الكنبه، زراع علي المخدع والاخر خلف المسند ،وكمان لو طقطق رقبته بتعالي تبقي كملت الصوره، ناقص يجيب رجلان حبشيان اقوياء يشيلوه ويهو عليه  ،ولو نظرت  للبنت تلاقي اهتماما في جلستها فكل ركن في جسدها متجها له ،فيخيل الي انها تلوم نفسها علي جلستها هذه بجانبه وان لولا الملاما لحدفت نفسها من علي الكنبه مرزوعه البدن علي الارض ارضاءا له وحفاظا علي مكانته ،فاذا لح لسان حال القارئ عن ماذا يضايق في ذلك حيث اننا في مجتمع ذكوري بحت وان الصوره التي رسمتها لاتسبب ضيق علي الاطلاق فأرد انا بدوري واقول اني في غايه الاشفاق علي هذا الرجل من كل قلبي حيث ان الانسه التي بجانبه في غايه الذكاء والدهاء، لقد ادخلته  قصص الف ليله وليله  حتي يأتي المأذون فيصيح الديك وتقول له :ولما ادرك شهريار الجواز سكتت شهرزاد عن الكلام المباح والطاعه العمياء....
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
 وحشتوني جدا جدا ويمكن اكتب البوست ده واغيب تاني مش عارفه بس عموما وحشتوني ووحشتني الكتابه من تاني.... 
باعتذر عن الغلطات الاملائيه

2013-03-28

الحلقه السادسه والسابعه ...

                  ولو انضنيت وفنيت وعمري انفرط
                     مش عايز ألجأ للحلول الوسط
                   وكمان شطط وجنون مانيش عايز
                   يا مين يقولّي الصح فين والغلط
                                عجبي !!

                            صلاح جاهين

((الحلقه السادسه ))علاقه الموسيقي بالثورات
لينك الحلقه هنا 




((الحلقه السابعه ))الموزع العبقري اندريا رايدر
لينك الحلقه هنا

2013-03-15

الموسيقي والكارتون



اصدقائي واحبابي وحشتوني جدا جدا ...بمناسبه المواقف الطريفه اللي بقابلها في الشارع، وانا بفتح باب العربيه علشان اركب ،تقوم تيجي عربيه معديه ،فاقفل باب العربيه  بسرعه تاني،  واهز رأسي علشان تعدي وماتخبطش الباب ،الآلاجه في الموضوع انها تقف عند باب دخولي العربيه بالظبط ،فالمفروض لأما انا افتح باب العربيه بتاعتي وتخبط فيها لأما احرق دمي وادي درس في الاصول للي وقف ،بصراحه ماخبيش عليكوا كان شكل الرجل زي ماتقول كده معلم كرشه يدّي عليَ (علي الشريف)ايام مجده ،ماخبيش عليكوا خفت ،اصل انا جبانه بصراحه ،فقررت افتح باب العربيه واخبط عربيته،المصيبه في الموضوع انه اضايق شوفتوش كده ،كنت عايزه ااقوله انتي اضايقتي يا قطه ،يا بطه ،يا كتوموتوا يا حلوه يا بطه،بس قولت ،اجري يا بت احسن يديكي بوكس في منخيرك يخليكي ماشيه زي الالف ، بلد مجانين صحيح علي رأي ابراهيم رزق
لينك الحلقه الخامسه اسفل البتنجان، قصدي في الخط الاسفل
هنا

2013-02-28

شابلن موسيقار وانا في غايه التوتر

الحلقه دي يا جماعه اول حلقه اسجلها امام الكاميرا وكنت في غايه التوتر وقلبي مابطلش دق واتكرر المشهد اكتر من خمس مرات علشان بغلط وخايفه ،بس الحمد لله خلصت علي خير ،طبعا في غلطات نحويه وقعت فيها واعذروني معلش :)
اتمني تنول اعجابكم ،لينك الحلقه هنا

2013-02-21

فيروز وموتسارت وانا وانت :)


الحلقه الثالثه دي يا جماعه عن اقتباسات الاغاني العربيه للموسيقي الغربيه بس  دي اقتباسات كامله ....انا غرضي توضيح الموسيقي التي اُقتبست.. اوع حد يفهمني غلط :)
لينك الحلقه اهو:
 http://www.vetogate.com/113715