2010-12-10

بهانه ع النت

يا ساده كان ياما كان يا سعد يا اكرام 
كان في حتتنا دهيه بت اسمها بهانه بت اسمها ايه يرد الجمهور :(بصوت عالي:بهانه .
(الراوي):بهانه الحب غواها والهوي غدار ملوهش امان واخدبالك ياواد يا رمضان 
(رمضان يعوج قفاه من الخجل) مع علينا ...البت بهانه دهيه كات بتحب عوضين كات بتحب مين اصحوا يرد الجمهور :(بصوت عالي :عوضين
(واحد من الواقفين):متخلصنا يا عم بجي وجول الحكايه 
(الراوي):حاضر يا وله من خمس سنين بس 
(رمضان):من خمس سنين بس
(الراوي):بس يا وله هات البرتجاله اللي في ايدك ديه ولا انا حاحكي ببلاش كي دي تعالو اجولكم الحكايه:
(بهانه):(تغني وهي واقفه في غرفتها امام مرايه مكسوره) كيدا العزال انا من يومي ايوه اه 
(بصوت منخفض ينادي عليها عوضين من وراء شباكها )
(عوضين):بهانه
(بهانه):(تجري مسرعه وتتكعبل علي الارض وتفتح الشباك)عوضين

(عوضين):بهانه
(بهانه):عوضين
(عوضين):بهانه
(بهانه):عوضين
(عوضين):بس بجي يا بت ان كت جي عشان كنت عايز(بهانه تقاطعه)
(بهانه):عاوز تاكل ادبحلك الوفراخ كلهم وادهملك يا عنيه
(عوضين):لا انا كنت عاوز(تقاطعه بهانه)
(بهانه):عاوزنا نهرب يا حبيبي
(عوضين):اهمدي يا بت انا كت عايز (تقاطعه)
(بهانه):عايزني اثبتلك حبي(تمسك قله من تحت الشباك وتكسر القله علي دماغها)
(يمشي من امامها قائلا:انا وجعت فهبله ولا ايه
(بهانه):(بصوت عالي)معادنا بكره يا حبيبي تحت الشجره اياها(اهل البلد جيرانهم يشاهدون وعوضين يجري مسرعا من الفضيحه)
(والد بهانه):بتكلمي مين يا بهانه
(بهانه):مفيش يابا
(والد بهانه):ممم طب اعملي حسابك يا بهانه واخده بالك انتي ان يوم الخميس الجاي جاي شعبان ابن عمك عشان يطلب يدك
(بهانه):لا ممكن وبدا اني بنحب عوضين يابا وحتجوزه
(والد بهانه):حبك برص وتلاته خرص هو جه يطلب يدك اصلا يا بنت العبيطه
(بهانه):طيب انا لو متجوزتهوشي انا هاهرب واموت نفسيتي كمان
(والد بهانه):كده ها طيب تلاته بلله العظيم منتي شايفه غير باب البيت من النهرده (ويجري مسرعا وياتي بالخشب ويغلق عليها شباك الغرفه بالمساميروالترابيس)
(بهانه):(تهمس لنفسها)ولو
وفي يوم اتسحبت بهانه من البيت ومسكها والدهاوفكت بهانه نفسها من يديه 
تجري بهانه والصوات يعلو وامها تصرخ والجيران اتلمت والكفر كله اتلم ومن بينهم عوضين وبهانه لم تجد امامها سوي نخله وطلعت بهانه النخله
(والد بهانه):انزلي يا بهانه
(بهانه):لا ممكن وبدا انا بحب عوضين وعوضين بيحبني
(واحد من الواقفين):انت بتحب بهانه 
(عوضين):لا وبدا مين دي
(بهانه):ولو موافجتش يا با علي عوضين انا حاخلع هدومي حته حته لغايه متوافج
(وبدأت بهانه بالفعل الخلع وشباب الكفر بدأوا بفتح الكاميرات وتبادل البلوتوث ومن بينهم عوضين 
(والد بهانه):(متحدث الي عوضين)متجولي يابني حاتجوزها 
(عوضين):لع
(والد بهانه):طب جولها
(عوضين):حاضر.بهانه تعالي كده شويه مش شايفك في الكاميرا كويس 
(بهانه):يعني مش حاتجوزني يا عوضين
(عوضين):لع 
(بهانه):لع؟
(عوضين):لع 
(بهانه):لع (ورمت نفسها من النخله علي( عوضين )قائله :طب خد (واعطته روسيه في دماغه قائله :لازم اخد بتاري منك يا عوضين
(عوضين):وحاتخدي تارك من البلد كولتها الزاي بعد العيال ما جريت ع السايبر عشان ينزلوا الفديو ع النت
وللأسف بهانه بقت ع النت





































هناك 15 تعليقًا:

  1. ههههه هي بهانة بس اللي بقت عالنت
    انتي بداتي الجصة يعني القصه بزمااااان
    وزمان لا كان فيه بلوتوث ولا موبايل
    تكوني بتعملي اسقاط علي حال
    الدنيا النهارده والتزوير والسرقة والنهب
    وخلع الملابس يعني الفضايح قدام العالم
    هو انا صح والا لا
    تحياتي اختنا الفاضلة

    ردحذف
  2. هههههههههههههه
    جميل جدااااا وما اكثر الفضائح هذة الايام وكلة بقى على المكشوف واللى مايشترى يتفرج
    اسلوبك المرة دى تميز بخفة الدم والتلقائية فى التعبير
    مشكورة يا قمراية وفى انتظار قصة جديدة

    ردحذف
  3. سواح
    انت لم تاخد ببالك نقطه صغيره ان الراوي كان بيتكلم عن قصه بهانه من اللي كانت موجوده من خمس سنين وشكرا علي تعليقك سواح

    ردحذف
  4. هبه
    اشكرك علي كلامك الجميل المشجع والحمد لله ان الذي كنت اقصده وصل لان الفضائح كثرت ع النت ووصلت حتي للريف

    ردحذف
  5. ههههه جميل

    تقبل مروري أختاه

    ردحذف
  6. مدونه الامل
    شكرا علي مرورك الجميل المعطر بالياسمين واهلا بك اختاه دائما

    ردحذف
  7. انا اسفه اهلا بك اخي دائما

    ردحذف
  8. هههه اسلوب فكاهي جميل
    والفكره حلوه
    تسلمي يا جميل

    ردحذف
  9. دكتوره هند
    شكرا يا قمر
    ويسلم قلمك الجميل

    ردحذف
  10. كارولين فاروق الجميلة
    اسلوبك جميل جدا
    ورائعه طريقة السرد
    فعلا مش بس فضايح النت من الشباب فضايح بلد في درامتها اللى بقت عنوانها ..للأسف الله يستر
    دام ابداعك وتميزك يا قمري
    سأكون بالجوار دائما

    ردحذف
  11. اسماء عبد العزيز
    استحسانك لاسلوبي شرف لي من كاتبه لها خبره مثلك
    وكان لابد ان اتكلم عن ظلم الذي يقع علي المرأه
    التي اصبحت ماده للسخريه والفضائح
    فالمرأه دائما ضعيفه بسبب رومانسيتها
    اتمني ان اسعد دائما بوجودك

    ردحذف
  12. كارولين فــــــــــــــــــــــــــــــــــــاروق
    الموضوع ليس بهانه ولا عوضين الموضوع هوه النيت وبلاويه
    وقلة الأدب وإختفاء الحياء مع تطور الأجهزة وإن الحبيب
    لايهمه الحب الأفلاطونى بقدر حبه للإثارة حتى لو مع من يريدها سواء حبا - زوجة - صديقة - أنثى
    بيتهيألى إن البلوتوث والموبايلات وكاميراتها والنيت وبلاويه والثايبر لحست عقولالناس ومابقاش فيه لابهية ولاعوضين ولا عبلة ولاعنتر ولا ليلى ولاقيس ولا نعيمة وحسن
    ولاأى حب بقى فيه جنس مفضوح وبس وإثارة جسدية وبس
    هذا هو التطور وخيالك صوره حسب الواقع المر المادى
    ضاعت الأحلام ومات الخيال ووئد المشاعر والأحاسيس

    ردحذف
  13. استاذي الفاضل
    فاروق بن النيل
    اسعدني مرورك العطر
    واضافتك وتعليقك لكلامي
    الحب موجود ولكن عجله الحياه ومسؤليتها
    شلت العقول وابعدتها
    وجاءت الاجهزه لتزيد
    الطين بله
    واصبح الحب عمله نادره
    وعواطف اتجوزت خلاص

    ردحذف
  14. ههههههههههه..
    هي بهانة بس اللي بقت ع النت...؟
    دي تقريبا كل عيلة بهانة :)
    طريقتك بجد بتخليني اضحك وانا باتخيل المشهد الفكاهي :)

    ردحذف
  15. تيمو
    شكرا يا تيمو
    وقد ايه انا مبسوطه انها ضحكتك
    وبعدين انت بتقول فيها
    دي مصركلها بقت ع النت

    ردحذف