2012-02-28

قول يا شألشه +تحديث




أنا : أزيك يا شألشه

شألشه :الحمد لله روضا

أنا:وازي مزاجك كده مش منيل ومأندل والكلام ده كله

شألشه:نحمده علي كل حال يا مودام

أنا: طيب أيه رأيك في الثوره يا شألوش

شألشه: والله يعني الثوره عملت حاجات حلوه بس مفيش شغل 
 زي الاول وكده يعني

أنا : وأيه رأيك في الاوضاع في مصر دلوقتي يا شنشيني

شألشه: دوقت الاوضاع في مصر عمله زي افلام الابيض وأسود


ازاي يا شألوش



حضرتك فاكره في الافلام العربي لما تقوم خناقه بين اتنين في قهوه 


اه فاكره


تلاقي لاموأخذه واحد بيتخانق مع واحد تقوم القهوه كلها تقوم علي بعض  طب الباقي يقوم علي بعضه ليه ما انت كنت قاعد مع اللي جنبك صحاب اللي قومك تضربه

والله نظريه



 وأيه رأيك في بشار 


قصدك هتلر يا مودام

ماشي هتلر ..أيه رأيك في هتلر سوريا


ده ماحصلش هتلر اللي كان بيقتل في العالم 


أزاي 


يعني هتلر كان بيقتل في العالم بس مقتلش شعبه وناسه 


فاكره يا مودام ايام الثوره بتاعتنا لما كنا خايفين من حد يهجم علينا في بيوتنا وكنا مابنمشي  


اه فاكره 


ده بقي اصبح حقيقي في سوريا دول بيدمروا البيوت اعوذ بالله

ده كمان بقتلوا الاطفال دي بقت حرب بينه وبين شعبه


أنا حاقولك يا مودام اصل بشار ده شاب مش زي مبارك والقذافي عواجيز يعني شوفي بقي لما الافتري يبقي جوا واحد شاب 


والله نظريه

الا قولي ايه القصه المريبه اللي انت عملها في شعرك دي يا شوشيني ..دي موضه ....ده فزلين خمس خمسات 


ده كوريم يا مودام مش عارفه الكوريم 


عرفاه عرفاه سمعت عنه بس ماهتمتش ... انت متجوز يا شألوش 


اسمي شألشه حضرتك ولسه ماتجوزتش 


معقوله يا شألشه بقي العيون المدغمسه دي والشعر الموزنبليه ده والبنطلون اللي بقالوا سنه ماتغسلش يعني الروشنه دي كلها وماتتجوزش

ههههه اصلي عايز واحده يعني  معاها فلوس وكده 

واحده معاها فلوس وكده!!!

اه واحده مريشه يعني واهلها مريشيين وقاعده علي فلوس يعني

اول مره اعرف ان في واحده بريش وقاعده علي فلوس تكونش عايز فرخه انت جعان يا شنواتي جعان؟

يافوتاح ياعليم ياروزاق يا كريم

طب ماتتعصبش طيب يا شنشن  


طيب انت ماوقعتش في بلاعه قصدي ف الحب زي البني ادمين 
يا  يا ولا بلاش اصلي مش عارفه احفظ اسمك


يعني حبيت واحده مطلقه ومعاها عيل بس كنت بحبها اوي.. حب رومنتيكي ...رومنتيكي رومنتيكي يعني


طب وبعدين


وبعدين ايه


(بصوت عالي) ماتجوزتهاش ليه


بتقولي ايه يا مودام انا لسه عازب وهي مطلقه وكده هون


وكده هون امممممم طيب وهو ده يمنع مش لسه قايل رومنتيكي 
وحسيت ان الدمعه حاتفر خلاص من عنيك وشاورت نفسي علشان اتأثر  معاك واعيط بس ماجاليش نفس بصراحه مااقتنعتش 


بحبها اه بس لما حبيت اقول لاومي رفضت وقالتلي ليه هي الحريم خلصوا عشان تتجوز مطلقه يا ابن الموكوسه


اممممم وانت؟


بصراحه اقتنعت بكده يعني


طب انت مقتنع ان الماما بتاعت ال  انت ممكن تمشيلك حياتكم زي ماهي عايزه 


اه طبعا 


طيب لو قالتلك طلق مراتك حطلقها 


 طبعا ..مافيش كلام 


طب انت رأيك ايه ف الشباب اللي مالوش رأي في مجتمعنا 


يعني ايه

يعني ايه رأيك في ادوارد اللي اتنازل عن العرش علشان كان بيحب واحده امريكيه مطلقه واسمع ان هي اطلقت مرتين

مش فاهم!!

يعني انت رأيك ايه في نفسك؟

انا شايف نفسي .......

ايه مش عارف ترد؟ اصلهم بيقولوا ان الشرقيين عاطفيين ولا ايه...

اه

انت موجود امتي علشان ماجيش

انا موجود هنا يا مودام علي طول

طب انا حاجي 

امتي 

الا تلت كده 

طب قوليلي قبل ماتيجي علشان لو عندي اجتماع مع اومي ابقي عارف


نظريه برده


* احبائي المدونين اشكركم علي اهتمامكم وحرصكم علي التواصل وعدم العزله وفتح التعليقات اشكركم من كل قلبي اشكر ابي فاروق فهمي ومصطفي سيف الذي احرجني بذوقه واشكر كل من اهتم وشارك بتعليقه لاعاده التعليقات لدي
















هناك 32 تعليقًا:

  1. اشكر بابا والدكتور مصطفى على تشجيعك لفتح التعليقات
    ده حب الناس يا كوكى ويارب دايما محبب فيكى خلقه
    بالنوسبه بقى للواد شالوش ده فى الضياع والاسئله كانت صعبه عليه اوى يعنى ده يعرف ادوارد منين هههههههه ده كبيره يعرف بشار وعم جميل البقال
    بس جوله عجب فى دماغ شألشه علشان نعرف الناس دى بتفكر ازاى فى السياسه والحب بس نسيتى تسأليه بيحط كوريم نوعه ايه يا مودام
    بوست دمه شربات زى صحبته ربنا يروق حالك حبيبتى
    دايما تمتعينا

    ردحذف
    الردود
    1. اخنى هبه
      بشرى لاسرة أل الفاروق فقد رزقنا الله باخوه واخوات محبتهن لاتقل عن محبتنا لبعض وكده بابا ما يقولناش عليهم ههههههههههههههه
      طيب يابابا وياترى المستخبى ايه بس حقيقى بذرة طيبه ومشرفه
      والبقية تأتى علينا جميعا بالخير

      حذف
  2. نسيت اقولك
    من اجل حنفى بحلفك بالعزيز الغالى
    لا تغلقى التعليقات مره ثانيه
    مساءك عسل يا احلى من العسل

    ردحذف
  3. جامده اوي بتاعت بشار ديه
    ايوه كده يا قمر
    شوفي بقى الكومنتات بتاعت حبايبك ديه
    هضيعلك الاكتئاب
    تحياتي لكي يا كارول
    واوعي تقفلى الكومنت تاني

    ردحذف
    الردود
    1. كريكة
      كم انا سعيدة ياكريكه
      السؤال اللى محيرنى ومطير النوم من عينى من اى منتجع اختير هذا الاسم الرفيع
      اسم هز وجدانى وروحى يا روح قلبى

      حذف
  4. الشكر كل الشكر حقا ليكى انت يا كارول ان احترمت رغبة الاحبه وفتحت باب التعلبقان بعد ما ساعدك اخوكى سيف على كسر قفله بالرغم من ظروفك المزاجية التى انا ادرى بها ، ومن شاف حالة غيره هانت عليه حالته
    والحمد لله اننى لم احصل جمارك من احد الامن الامورة كريكة ولو انها تهربت من الجمارك لانها ابتسامة واحدة لا تكفى
    وفتحا مبينا ان شاء الله
    ابوكى الفاروق

    ردحذف
  5. مفيش شكر بين الاخوات
    ايوة كده يا كارول شايفة بقى اهلك و اخواتك المدونين ازاي منورين صفحتك و مدونتك
    بذمتك مش جو المدونة كده احلى
    حد يلاقي الناس دي معاه و يقفل في وشهم الباب
    خلي بابك مفتوح و رحبي بالضيوف
    اما عن الاكتئاب فعادي
    مين معندوش اكتئاب
    و زي ما قلت قبل كده علاج الاكتئاب مش انك تقفل عليك و تكتئب علاج الاكتئاب انك تفتح شبابيك و تتحداه وتطلعله لسانك وقوله مش مكتئب
    موت بغيظك
    الدنيا متستهلش لحظة اكتئاب

    ردحذف
    الردود
    1. كلما يمر الوقت بنا جموع المدونين حتى يظهر على السطح ما كانت تخبؤه مياهنافى القاع من ثقل ما تحمل
      الشكر مش كفاية عليك ياسيف
      وربنا يجمعنا ونشوف كلنا بعض تانى وتالت ورابع

      حذف
  6. هو نموذج موجود في المجتمع

    اجدتي وصفه

    هو يسمع شعبان ويطرب له ويفرح جدا لما ينقط في فرح

    كنوع من اثبات الوجود ويكلمك في الدين بأسلوبه

    عن اقتناع برأي الشيخ خطيب الزاوية

    حتي لو كان هذا الخطيب غير مؤهل للخطابة

    ويتعامل معاكي كأنك تجهلين الحياة لو خالفتي رأيه

    تحيتي

    ردحذف
    الردود
    1. تعليق اضاف الى البوست معنى جديد واوسعه عبرة وحكمة
      اشكرك يا خالد على تعليقك الرقيق

      حذف
  7. أول زيارة لي في مدونتك الرائعة
    دعيني ألقبك بالساخرة الساحرة
    أعجبت جدا بشألشه نموذج مصري أصيل
    وبأمه (مع اننا نتشدق بالرسول واتباع
    السنة ولكن لا نتبعه في تلك وننسى زواجه من خديجة
    بنت خويلد الأرملة والتي يبلغ عمرها 40 )
    وسمة العصر في البحث عن عروسة أصبح الخيار
    الأول من شروط اختيار الزوجة (تنكح المرأة لأربع / لمالها وجمالها وحسبها ودينها فأظفر بذات الدين تربت يداك)
    طبعا العصر اللي احنا فيه اكتفى بالأولى
    ورايه في الثورات وما نسميه بالربيع العربي
    لخصه بعفوية كويس ان غيرنا ولكن ماذا عن العمل؟
    بشار وصفه بهتلر (مع أن السوريين كانوا يعشقون
    بشار وحافظ الأسد أباه رحمه الله غير الدستور
    السوري لتعين ابنه رئيسا للجمهورية السورية -
    يعني هم اللي ابتدعوا التوريث .............

    مش عارفة (انتي حدوته كبيرة أوي)
    ليه تكتابي وانت مليئة بالحياة؟ وتملكين قلما
    يقهر كل حزن وهم وألم ... عبري واكتبي
    وأفرغي همك في كتابتك ستبدعين ولا تحرمي أصدقائك
    وانا سيكون لي الشرف لو قبلتيني بينهم نستمتع
    بكل كلمة ..... والان أرجأت الكلام عن الحب للآخر:

    للحب دوما حبيبتي معطيات تختلف من رجل وامرأة
    دوما المرأة حبها لرسوخ والرجل حبه لأفول
    سأطلب منك أن تستمعي لأغنية فيروز (باكتب اسمك يا حبيبي)
    وسانتظر ادراج تحدثيني فيه عن الفرق بين جب الرجل والمرأة
    كما ادرجتي من قبل عطاء المرأة والرجل
    حبيبتي أأسف كثيرا للاطالة ولكن لقلمك روح يصعب
    الوقوف دون التعليق ... تحية اللجين لابنة الفاروق

    ردحذف
    الردود
    1. من كارولين الى اللوجين
      كم ازاح تعليقك عنى كل هم وغم
      اكيد انك دارسة للتحليل النفسى
      كم اود ان اعرف الكثير عنك واضمك الى لائحة شرف اصدقائنا
      وسامحى قلمى عن التأخير فكل تأخيرة وفيها خيرة
      وقد اسرعت لتلبية نصحك بسماع فيروز ( بكتب اسمك يا حبيي )
      اما عن الفرق بين حب الرجل والمرأة فانه لا يختلف كثيرا عما اسلفتى فدوما المرأة حبها لرسوخ والرجل حبه لافول
      ابارك كلماتك واحببت انين قلمك الصداح

      حذف
  8. ايه ده فؤادة فتحت الهوبس؟ ....رأي قلته عند الاستاذ فاروق ...تحياتي

    ردحذف
    الردود
    1. فكرتنى ياتركيب بهذا الفيلم المتناهى الروعة جماله ماوصفشى على رأى شادية بطلة هذا القيلم والتى اثبتت جدارتها فى التمثيل جدارتها فى الغناء
      بالذمه فيه افلام زى دى دلوقنى يا تركيب
      اعذر تأخيرى وقدر ظروفىالصحية

      حذف
  9. دكتورة كارولين
    ألف حمد لله على السلامة ، و يخرب بيت شألشة اللي زغلك و جابلك اكتئاب و خلاكي تخدي جنب و تحرمينا من بوستاتك.
    بس تصدقي أول مرة آخد بالي من موضوع الناس اللي بتتشاكل في الأفلام العربي ، و الله عندك حق. لأ ، و كمان لما يبقى قيه مريض و تقوم حبيبته مدياله حبة دوا و هو لسة بالعها و تسأله: هيه مش أحسن دلوقتي ؟
    بالنسبة لشكل المدونة غيريه زي ما نت عاوزة يس لو هتبيعي الصالون اديني خبر علشان يلزمني

    ردحذف
    الردود
    1. استاذى عمارة انت عامر بالود والسلامة ونحن جميعا فخورون بتواجدك بيننا
      انت تطلب اللى انت عاوزه صالون ايه هييجى ايه جنب صالونك الادبى
      الذى يجمهنا غلى الانس والسمر
      وبالنسبة للافلام العربية تلقيك كنت نايم وهما بيتخانقوا هههههههههه

      حذف
  10. كارولين حبيبة قلبى
    احترم جدا رغبتك فى غلق التعليقات لكن مسموح لك بهذا فترة بسيطة فقط

    انا عارفة لما الانسان بيكون عايش حالة اكتئاب او قلق او ضيق نفسى بيكون عايز يبعد بعيد عن كل الدنيا بما فيها من احباب واعداء ويكون فى مكان ما يعرف فيه حد ولا حد يعرفه

    انا مثلك تمام ياكارولين لما اشعر بضيق او حزن
    بس حبيبتى ما تخلى اى شىء يأثر عليك وما يبعدك كتير عن احبابك
    خدى وقتك فى اعادة النظر فى حياتك زى اى انسان طبيعى لكن ما تخلى الامر يتعدى المفروض علشان ماتتعبيش وتتأثرى

    احيانا الانسان بيشعر بحزن ومش عارف ايه السبب دة شىء طبيعى
    لكن اعتقد انك لمست حب كل الناس لك ولكل ال الفاروق الطيبين


    حمد لله على سلامتك وسلامة التعليقات يا غالية ويارب تكونى بخير الان ودايما ياااارب بخير وسلام

    هدية بسيطة فى مدونة مون لايت لو عجبتك وحبيتى تختارى صورة منهم تحت امرك
    لان الصور بالمدونة حجمها صغير قوليلى على الحجم المناسب وانا تحت امرك اعدلك الصور اللى تعجبك ( ده لو عجبتك يعنى هههه )

    http://l-moonlight.blogspot.com/2012/03/blog-post.html

    تحياتى لك وحبى ومودتى

    ردحذف
    الردود
    1. ممكن تضغطى على الصورة اللى تعجبك ياكارول وتعملى لها حفظ بعد ظهورها ان شاء الله ستظهر بالحجم المناسب

      حذف
  11. ليلي الصباحي
    كنت متأكده انك حاتحجبيه
    ولم اطلب منك هذا
    لان من يحمل اخلاق عاليه مثلك
    يتوقع منه الكل اكثر من هذا
    اشكرك من كل قلبي علي الهدايا القيمه والجميله
    مثل صاحبتها
    نفسي تطلبي مني اي حاجه بجد
    احبك احبك في الله حبيبتي
    لكي مني كل الود والورود والزهور والعطور

    ردحذف
  12. نفتخر ونعتز بكى دائما كارولين لماذا تريدى ان تجعلينا بدون ابتسامه نشعر دائما وانتى معنا بكتاباتك وكلماتك الساخره الرائعه بالسعاده
    اتمنى ان تسعدى فى حياتك دائما لكى تحياتى ابوداود

    ردحذف
    الردود
    1. ابو داووووووووود
      كلماتك اسعدتنى وريحتنى يا داوود
      اتأسف لتأخيرى فى الرد ومهما وصل قلمى لن يصل الى اعالى تقدير آل الفاروق لشخصكم الغالى
      دى بقت عشرة يا اسناذ محمد
      ربنا يديم المعروف

      حذف
  13. حبيبتي الغالية كارولين

    أنت قلم رائع وبوح جميل يمس القلب
    ويفتح لنا ابواب ومتنفسات مما نعاني
    اعلمي انك قوية بذاتك وبمن حولك وفيروز
    بالفعل أسرفت في الوصف وفي ايضاح الفروق
    فحيث كان يقول لها احبك كانت هي تقول ولكن
    قولها يختلف ... فقد كانت تنحته على لحاء الشجر
    وهو يكتبه فوق الرمال فاذا ما امطرت الدنيا وهت كلمتها
    وازدادت رسوخا وكلمته تزول مع المطر
    كان يهديها وردة وكانت تود لها الدوام فوضعتها في كل
    موضع من شأنه ان يحويها ووجدت أنها ان كملته سيدوم
    فأحضرت المزهرية... والى ىخر الأغنية حتى تضع
    أصول الحب عند المرأة وبواهتها عند الرجل ...
    (مع الاعتذار للرجال - لكن ذاك لايعني اننا نملك
    نماذج لمحبين رائعين ) أنزلت في مدونتي ادراج لك
    أرجوا منك أن تتفضلي وتقرئيه ولعله يلقى القبول
    (نورت بيتك - اأقصد مدونتك الجميلة)

    ردحذف
    الردود
    1. من كارولين الى اللوجين
      زيارتك الثانية اثنت على الرخاء والبهاء، نسمات كلامك أعجز التعقيب عليها
      اسهبت فى موضوع الرجل والمراة والحمد لله انك لم تتعممى فروضك ، ومن الواضح مرورك بتجربة فاقت قدرتك على تحملها والسبب كله من عوطفنا الرقيقه التى لاتتحمل التيارات الفجائية العنيفه

      حذف
  14. كلارينيت الفاروق

    بجد انا غلطان قوى معرفش انك فتحتى التعليقات الا لما بابا علق عندى
    اصل ظروفى اليومين دول ملخبطة شوية بس بحاول برده التواجد

    بس هاقولك حاجة من اخوكى ابراهيم
    قفلك التعليقات و فتحها غطى على تعليقات القصة الجميلة اللى عجبانى جدا جدا جدا
    هههههههههههههههههههههه
    احسن عشان متفقليش التعليقات تانى امال لو كانت بتجيلك تعليقات زى حالاتى

    بجد سعيد بفتحك التعليقات و اوعى تقفليها تانى

    تحياتى لكى

    ردحذف
    الردود
    1. الف سلامة لبك اخى ابراهيم اصل ابويا يحب يحبكها قوى
      هوه بالكلام ياابراهيم لما شفناك شعرنا فعلا ان هناك فرق كبير بين رؤية المكتوب ورؤية القلوب
      شكرا جزيلا وربنا ما يحرمناش منك

      حذف
    2. تدوينة انسيابية و سلسة و راقية ...

      تقديري و اعجابي

      منجي / الزمن الجميل

      حذف
  15. بشار دة هيروح النار مش عارف ازى بينام وهو عمال كل يوم يقتل فى شعبة مش ممكن يكون انسان ابدا

    ربنا يصلح الحال يارب

    حمد الله على السلامة ياكارول

    مع خالص تحياتى

    ردحذف
  16. الفنانة الجميلة والرائعة/ كارولين
    هاتان الشخصيتان وذاك الديالوج هم بلا شك من بنات أفكارك وخيالك المنطقي جداً لذلك تم ضعهم بعناية فائقة داخل لوحة لملمت واقعنا وكثير من تناقضاته التي أفرزت لنا داخل منطقتنا العربية بلا شك إناس كُثر يقولون ما لا يفعلون، ويفعلون ما لايقولون يرددون بما لا يؤمنون، ويؤمنون بغير ما يرددون مجتمعات تدعي المثالية وهي أبعد ما يكون عنها
    وعاوز أقولك ياشألوش ان هتلر قتل شعبه بوضعهم في أتون الحرب فلا فرق فالإثنان بشار وهتلر قاما بقتل شعبيهما
    اللهم أرحم أمتنا الإسلامية وأحفظ أوطاننا وأبعد عنها شر الفتنة
    في النهاية لايسعني إلا أن أحييكِ على قلمك الساخر الضاحك الباكي
    تحياتي
    حسن أرابيسك

    ردحذف
  17. التعليقات اتفتحت هيه هيه هيه

    هههههههههههههههههههههه
    ههههههههههههههههههه
    ضحكت ضحك السنين خاصه وانا بقرأ واشتغل مع البوست طب بيسي بيسي بيسي وابعد بقي عن قميصي
    بيجد بستمتع هنا جدآ
    خاصه شغل الالش دة هههههههه
    عسل وسكر انتى اوى يا كاروالين :))

    ردحذف
  18. عجباني جدًا شخصية شألوش، ومُتفق معاه في حاجات كتير..

    عرفتي تحللي الوضع بطريقة بسيطة ولطيفة، وساخرة.
    تحياتي :)

    ردحذف
  19. يبدو ان البنت قابلت نظرية متحركة
    هذا الرجل قابل لفهم كل شيء واستيعابه
    والاكثر التماشي معه
    لكن ينقصه فهم المرأة
    كاتبة رائعة
    وقلم ساخر جميل

    ردحذف