2012-03-19

بخاطرها


بخاطرها بضفاير جدايل لون الشمس وبشرتها تحاكي تنافس صفاء المىّ وعيونها بلون الجنه ورموشها باب رضوان لمين تديله نظره والكل يا ولداه غلبان لا ملي يوم العين حدا ولا شغل القلب جدع من الجدعان لكن ده حاولوا كتير لكن روّحوا بيوتهم وعلي راسهم خيبه تتوزن  يا ولداه تمليَ البلد دي حكاوي كت كده وكتير من الحكايات رافضه ست الامل و الجمال دوّن ودوّن عشان في خيالها فارس علي خيل ابيض ع الباب لكن يا حسره لسه اوانه ماجاش ان شافها الحبايب صلوا ع المصطفي الحبيب وان شافها الحساد شهقوا بعين كارهه ومشيوا بعيد ناكرين جمالها لاجل النوم يجلهم اصل الكره يا ولهم  طير النوم من عينهم.


بخاطرها كانت وحيده الام والاب تأمر وتنهي ولا يقدر حدا يقول لها لأ كله آمين ومفيش بعدين مهو اصل جمالها يسر العين ولا فيش في الحِجرغيرها والورث ماهوش رايح لغيرها.

وف يوم  سهاها النوم لحد الضحي وحتصي ليه قبل الضحي لا عجين مستنيها تعجنه ولا فرخ تأكله ولا حلب تحلبه ولا زرع تقلعه مهو كله تحت الاوامر جاهزُ وفتحت عينها بخاطرها علي صوت نباح كلبها مع زغاريد خدامها مع ضرب طلقات بنادق مُفرحه
وطلعت بأعلي صوت

بخاطرها: أيه في ايه ..أيه الدوشه والزنبليته دي
 ام الخبر(خادمه): مبروك يا ستي الف مبروك
بخاطرها: مبروك علي ايه بجي ان شاء الله !!!
ام الخير: الباشا جرا فتحتك يا ستي (وترقع زغروته)..(تقاطعهابخاطرها)
بخاطرها:جروها عليكي بدري يا مجنونه انت انتي بتقولي ايه ..انا نازله اشوف في ايه(تنزل بخاطرها لحد مكتب الوالد)
بخاطرها:(تنظر في عين المفتاح لكي تري ابيها يجلس بجوار شاب فلاح ولكن يظهر عليه العز.. فتشد يدها امها وتقول لها)
الام: اللي بتعمليه ده تعالي كده شويه علشان ادخل صنيه الشربات اوعي
بخاطرها :أمه !!!
الام:هُس ولا كلمه الكلام بعدين مش دلوجتي اطلعي كيده اغسلي وشك وسرحي شعرك كيده يلا.(تدخل الام مرحبه بالعريس وتغلق الباب ورائها دون ان تتحرك بخاطرها من مكانهاخارج الغرفه وهي في حاله استغراب..وعندما تخرج من الباب مره اخري الام تزحزح بخاطرها بعيد عن الباب وتقول لها)
الام : انت لسه واجفه عندك
بخاطرها : في ايه يا اما!!
الام:في عريس يا روح ماما
بخاطرها:كده هو من غير ماتخدوا موافجتي
الام:حناخد موافجتك ماتخافيش يا حبيبتي يعني انتي حاتقولي لأ(تذهب الام الي المطبخ وتمشي ورائها بخاطرها مسرعه)
بخاطرها:وده يبقي مين ده ان شاء الله!!!
الام:ده متولي ابن ابو اسماعيل اللي اخته اسمها ايه دي خوخه
بخاطرها :يانهار ملوهش الوان
الام :في ايه يا بت ايه سمعتي عنه حاجه كيده ولا كيده
بخاطرها :هو ده العريس يا أما
الام :فه ايه يا بت انتجي 
بخاطرها:ده اتقدم لبنت عمي وفاج ومردياتشي بيه أأوم اني ارضي بيه
الام:طب وماله طب دي وفاج دي هبليه وانتي مالك بوفاج
بخاطرها:بجي اني اللي احلي مينها واغني مينها اخد ده ..اهو ده اللي مش حايحصل ابدا
الام: يا وجعه مطينه هو كام عريس يا بت(تتركها بخاطرها وتطلع غرفتها تاركه والدتها تتكلم وتصفق يدا  بيد)
وطار العريس
وتولت العرسان في التوافد والطيران طالبين الرضا والموافقه وتوالت بخاطرها في الرفض والاستكبار ده طماع فيه وده اقل مني علام وده شكله مش عاطفي وده ظوافره طويله وده امه مسيطره وده اخته معفنه وده بيهرش كده وده بيعمل كده 
لحد ماوصلت للثلاثين من العمر ووفاج اتجوزت وعفاف اتنيلت ورُخره خلفت وعلانه اتجهزت...وفضلت بخاطرها بخاطرها من
 غير جواز وعلي رأي المثل خطبوها اتعززت وفتوها اتندمت...
                                   تمت






هناك 42 تعليقًا:

  1. بس حقيقى بخاطرها عندها حق فى انها تتعزز ههههه


    رسمت حوار للمشهد رائع
    واتقنتى حتى الألفاظ الصعيدى
    شرحتى ادق التفاصيل بالمشهد بأهتمام

    احييك اختى الحبيبة

    لكن لو نظرنا لمضمون القصة بالفعل هى مشكلة تعانى منها الفتيات فى هذا العصر
    كثرة البنات التى تعانى من العنوسة ليس فقط لانهم لا يتمتعون بالجمال بالعكس اغلبهم متفوقين بالدراسة ولهم مكانة علمية وعلى خلق ولا ينقصهم شىء لكن للاسف الرجال لهم مواصفات خاصة لا تتوفر فى هؤلاء

    اما صنف النساء اللى بيتبغددوا بغرور زى بخاطرها فهم يستحقوا نتيجة افعالهم

    احسنت كارول الغالية
    بارك الله فيك

    تحياتى لك وتقديرى

    ردحذف
    الردود
    1. ليلي الصباحي
      تعرفي يا ليلي عملوا احصائيه عن عدد الذكور والاناث
      واكتشفوا ان عدد الرجال اكثر بكثير من عدد الاناث
      ولكن السبب في ان الرجال لا تريد الزواج
      ولان السبب الحقيقي هو جري معظمهم وراء السهل لممتنع
      اشكرك علي اطرائك الراقي
      وبارك الله فيك
      تحياتي وتقديري

      حذف
  2. خليها قاعدة بخاطرها :)مش هي اللي عايزة كده؟
    جميلة يا كارولين و ساخرة و بتعبر عن واقع كتير من البنات
    بس قوليلي هي وفاج دي يعني اتكتبت كده علشان تبيني انهم صعايدة و لا ايه؟

    ردحذف
    الردود
    1. مصطفي سيف
      هههههههههه
      هي وفاج طلعت كيده عفويه اصل اندمجت شويه
      علشان الصعايده يمتلكون خفه الظل يا مصطفي
      ولا تنسي اني املك العرق الصعيدي
      فجذوري صعيديه
      تحياتي

      حذف
  3. هههه حلوة اوى يا كارولين
    حلوة اللهجة كمان :)

    وبخاطرها بقى خليها
    بس ايه موضوه الثلاتيثن ما تزحزحوه شوية :)

    دمت بخير
    على فكرة معزوفتك جميله تسلم ايدك وزوقك

    رؤى

    ردحذف
    الردود
    1. أمه الرحمن
      هههههههه
      حاضر نزحزحوهه شويه ونخلوها واحد وثلاثين
      تسلم ايديك انت حبيبتي
      مبسوطه كتير ان المعزوفه عجبتك
      يا رؤي
      تحياتي وتقديري

      حذف
  4. رغم ان بخاطرها تبان طالعه فيها بس ماحدش بيرفض نصيب

    عجبتنى جدا وفاج ده ههههههههههههه


    جميلة يا كوكى جدا

    ردحذف
    الردود
    1. reemaas
      الدكتوره نور نور المدونين
      ميرسي حبيبه قلبي علي المناقشه الجميله دي
      اما وفاج ههههههههه
      دي ليها معايا حكايات في بوستات قادمه
      انت اللي جميله يا نور
      اشكرك

      حذف
  5. من كتر خطابها بارت هههههه

    هي اسباب بس لسة النصيب ماجاش

    تحيتي يافنانتنا

    ردحذف
    الردود
    1. سواح في ملك الله
      من كتر خطابها بارت
      هي كده فعلا هههههه
      اشكرك يا خالد
      تحياتي يا ريس

      حذف
  6. فيه حاجات غريبة في القصة دي :))
    يعني بذمتك الصورة اللي فوق دي تمشي معاها اسم بخاطرها :))
    و بعدين بنت الباشا تتجوز من ولاد ابو اسماعيل ، هو انت مش عارفة انهم عاملين مشاكل مع بوحة :))
    و بعدين الباشا يقابل واحد لابس جلابية ، أمال فين اللي حصل مع الريس عبد الواحد :))

    ردحذف
    الردود
    1. محمد محمود عماره
      ههههههه
      تصدق انا فشلت في البحث عن صوره فلاحه جميله
      زي ما انا وصفت بخاطرها وما صدقت لقيت صوره
      يعني تشبها الي حد ما
      اما عن ولاد ابو اسماعيل انت مش عارف انهم سابوا البلد
      بعد مشاكلهم مع بوحه هههههه
      اما عن الجلابيه مفهيهاش حاجه
      كبارات البلد مهما كانوا اغنيه وعُمد
      بيبقوا بالجلابيه محتفظين
      مش بيرموها
      تحياتي يا اجمل ضحكه في البلوجر

      حذف
  7. ودى كانت نهايه بخاطرها
    بخاطرها بقى هههههههههههههه
    حلوه القصه والحوار جدااا
    مضمون القصه واقعى للاسف كل بنت عايزه راجل متفصل على مزاجها
    وفى الاخر بترضى باقل من كده بكثير
    ضحكت على اللهجه الصعيديه المتينه وخاصه وفاج عمله شغل عاااالى
    ربنا يسعدك زى ما ضحكتينى على الصبح
    سلامى لبخاطرها ووفاء ومسعده
    يا عسل يا كوكى

    ردحذف
    الردود
    1. طبعابخاطرها لم يخطر ببالها اللى هيحصل بس تعرفى ياهبه حكاية العوانس انتهى وقتها من زمان دلوقنى الناس بتنظر للبنت على انها هى التى ترفض العرسان ويعلو نظرهم ليها وعلى لرأى المثل كل تأخيرة وفيها خيرة الرجال

      حذف
  8. انت يا بت ياكارولين من الزمن الجميل والا ايه رغم صغر ستك ليه الشعبطه دى فى الكبار
    حكاية بنشوفها فى كل زمان ومكان لكن اسلوبها وسياقها فاق الحدوالوصف
    فنانة فى الموسيقى وفنانة فى الكتابة وفنانه فى التعليق
    خلليتى ليا ايه طب الكتابه مقدور عليها والنقد كذلك اما براعة الاداء والتأليف الموسيقى فهذا امر الوصول اليه صعب بعيد
    انت واختك نازلين بالتقيل على القديم وانا عمال ساسك فى التعازى واروح هنا وروح هناك وسايب قديمى
    بس يا كارلو انا ليه تعليق بسيط قوى
    ما الخطر اذا وصلت البنت لسن الثلاثين ..... ست النضوج العقلى والجسمى .... سن الفتون والجمال اللى يقود القلوب الناعسة ....مش البنت الخيبانه اللى يتغرق فى شبر عاطفة
    المهم فى الفارس اللى يرمى بياضه
    وكما قال شاعر الربابة
    يرى ذوالوصل انهن ستات ** وذو الهجران انهن شمطات
    اكثرى من هذا اللون حتى تكثر سعادتنا ونتلهى مما نحن فيه
    مع سلامة الله اتركك حبيبتى

    ردحذف
    الردود
    1. يابووووووووووووووووووووي ايه الحلاوة دي كلها

      حذف
    2. ابى العزيز انا انكش ايامكم الحلوة العادات والتقاليد المتوارثة
      صحيح كان زمان السن هو الحكم ف فى عنوسة البنت انما دلوقتى البنت مش بسنها ولكن باكتمال شخصيتها ونضوج وعمق فكرها للحياة

      حذف
    3. محمد عامر
      دى حلاوة وصولك الى مدونتى

      حذف
  9. كارولين الحالمة بواقعية

    جدتي زمان كانت تقول (البطران سكته قطران) - ومشكلة تاخر سن الزواج بجد مشكلة كبيرة جدا لدرجة ان المعايير ماعدتش زي الأول - واذا بخاطرها ماعرفتش ان خيالها لسه ماجاش هاتنتظر كتير - ولو عايزة المال هاتلاقي- ولو عايزة رجال (ياترى هتلاقي؟) - أنا كنت أفتكرها مارضيتش بالعريس تحسبا لمشاعر بنت عمها لكن يبدوا انك فعلا يا كارولين تنتمين لهذا العهد والعهد الآن معايره اختلفت جدا... تحياتي لك حبيبتي

    ردحذف
    الردود
    1. الصديقة العزيزة لجين
      اسعدنى وشرفنى تواجدك فى مدونتى ، صحيح عزيزتى انا بحس بحنين الى الماضى مبعثه تواجدى بداية حياتى قى حى باب الشعريه و انتماء جذورى الى جنوب مصرحيث النخوة والاباء والطموح وعدم الرضا بالقليل الذى لا يشبع ولا يغنى من جوع
      تواصلك يسعدنى دائما يا دكتورة

      حذف
  10. حلو اوي...وعبرتي عن المشهد بواقعيه وببساطه جدا
    وخليها قاعده بخاطرها عماله تتعزز وتتبغد...ههههه
    بس بجد حلو اوي اوي...تسلمي

    ردحذف
    الردود
    1. اميره على
      هيه مش قاعده ولا واقفه هيه بنلف حوالين نفسها يمكن فى لفتها تقابل وتعتر على منشودها الضال
      نورنى حبيبتى

      حذف
  11. كلارينت الفاروق

    ههههههههههههه
    فعلا خطبوها اتعززت و فتوها اتندمت
    و من كتر خطابها بارت
    و استنى يا رزيقة لما يجيكى العريس
    و استنى يا رزيقة حتى يجييكى العريس
    و اذا بنتك دبت و حبت اسال امها ايه خبت
    و اصبحت تطبق المثل ده
    زوج من عود احسن من القعود

    تحياتى و احيكى جدا جدا جدا على المزيكا

    ردحذف
    الردود
    1. والله يا ابراهيم انت حلال العقد
      صحيح (زوج من عود احسن من القعود
      طب يا ابراهيم مين يعرف العود ده هيعود على بخطرهاعودا حميدا او عودا بغيضا
      مين يعرف على رأى فريد الاطرش
      شكرا لمرورك المجلجل باوتار العود

      حذف
  12. مساء الورد كارولين

    في مثل جميل يقول من يرفض العشرة سيقبل بعدها سبعه

    التشرط نهايته سيئة جداً وخصوصاً إذا كان التمنع دون

    سبب جوهري وإنما تافه فإذا أتاكم من ترضون دينه وخلقه

    فزوجوه ولكن ما يحدث الآن هو العكس تماماً ...

    تحياتي وإحترامي

    ردحذف
    الردود
    1. على رايك يا فارس اللى ميرضاش بالتون يرضى بشرابه ومن يرفض العشرة سيقبل بعدها سبعه
      ياسلام على امثال زمان واهل زمان
      شكلرا يا نيبال على زيارة مدونتى التى ازداد نور ضياها بتشريفك

      حذف
  13. الفنانة/كارولين
    جميلة جدا الخلفية الموسيقية وهي بالطبع للموسيقار فؤاد الظاهري رحمة الله عليه
    بلا شك جميلة هي اللهجة الصعيدية وعلى فكرة الكتابة باللهجة العامية أصعب من الفصحى لجعل القارئ يصل للنطق الصحيح للكلمة العامية في لهجة معينة لذلك فإن لم تكن التهجئه صحيحة اتلخبطت الدنيا
    الحكاية حلوة وانتي عاملة ليها سيناريو بسيط جميل
    وفتحت عينها بخاطرها علي صوت نباح كلبها مع زغاريد خدامها مع ضرب طلقات بنادق مُفرحه
    لكن الفكرة طبعاً قديمة ومستهلكة وقد عالجها من قبل الفيلم السينمائي القديم المراية بطولة نجلاء فتحي
    والحقيقة سن الثلاثين في هذا الوقت بالنسبة للفتاة لم يُعد له هذا الآثر النفسي السيئ عليها مثلما كان يحدث من قبل من ربع قرن وما قبله عندما تتزوج الفتاة في سن ال 16 وال 18 والحقيقة سن الثلاثين اكيد بلا شك تكوين العقل ودقة وحكمة الاختيار فيه أفضل بكثير عن السن الصغير لكن المشكلة تكمن فقط في التغيرات الفسيولوجية التي سوف تصبح قريبة وعلى بعد سنوات قليلة من فرص المرأة ومشاكل الحمل معها عدا ذلك فلا مشكلة وقد أصبح اليوم هذا السن بدون زواج عادي جداً لأي فتاة
    تحياتي
    حسن أرابيسك

    ردحذف
  14. يا جماعه والله انا عارفه ان الفكره اتهرست في ثلاثين
    دراما
    بس انا حبيت اضيف عليها اسلوبي مش اكثر
    انا لست بهذه السذاجه حتي اعتقد ان فكره الدراما
    تنتسب لي ولكن احببت اضيف اسلوبي ليس اكثر

    ردحذف
  15. بما أن مفيش غيري كتب عن استهلاك الفكرة
    وبما أن هناك تجاهل لي للرد علي بشكل مباشر
    فاسمحي لي أختي العزيزة أن أوضح أمراً ولتتقبلي مني بسعة صدر دون غضب
    بادئ ذي بدء لم أعترض على الأسلوب
    ولكن الأسلوب لايعني أن ألبس الفكرة ثوباً أخر وأنتهت المسألة
    بمعنى لاداعي ان تستبدل اكسسوارات الشخصية أو أكسسوارات المكان بمكان أخر بمعنى تغيير فتاة المدينة بفلاحة أو العكس أو الملابس المودرن بالجلابية الفلاحي أو القرية بالمدينة قيسي على كده كتير وإن حدث هذا وبالطريقة دي نحن لانقدم اي جديد سوى الصورة المرئية فقط وتظل معالجة الفكرة واحدة والسياق واحد محلك سر
    فتظل الفكرة جامدة في مضمونها ( وتشريح الفكرة في زمن سابق يختلف عن زمن أخر لابد من الاشارة والانتباه اليه لأن الزمن يختلف وتركيب وتكوين الشخصية يختلف باختلاف حاضره الذي يحياه
    ومتى تصبح المعالجة مختلفة في مثل هذا النموذج الذي تناولتيه ونحن في هذا الزمن
    وليس الزمن القديم الذي تناولتيه وكانت فيه المرأة تنتظر فيه خُطابها
    أما الأن وأنا أعالج الفكرة داخل الزمن الحاضر الذي نحياه اختلفت فيه المفاهيم واختلفت العادات واختلفت فيه العقول واختلف فيه مفهوم القبح والجمال، فنرى اليوم أن الفتاة تسعى وتقترب لمن تهواه نفسها دون المساس بحيائها وأصبحت الكثيرات من الفتيات ممن تجاوزن هذا السن دون زواج إما أن تنتظر دون جزع شديد هذا الزوج وهي لديها يقين بأنها تفضل أن تحيا بقية عمرها وتعيش حياتها بالشكل الذي ترضاه وترسمه لنفسها طالما لم تقابل هذا الرجل الذي ترضاه دون أن يتدخل في حياتها ويغير مسارها ويجهض احلامها هذا بالنسبة للمرأة المتعلمة وبالنسبة للمرأة غير المتعلمة لم تعد تؤمن بالمثل القائل ضل راجل ولا ضل حيطه لمجردالاستسلام لفكرة الاقتران برجل، لم تعد المرأة كما في السابق تبكي على اللبن المسكوب عندما يفوتها سن الزواج ولم يعد المجتمع ينظر إليها تلك النظرة القديمة التي كانت موجودة في السابق لأنها الوم أصبحت شريحة كبيرة داخل المجتمع لظروفه التي فرضت عليه
    لاخت العزيزة كارولين هل شاهدتي مسرحية كارمن لمحمد صبحي
    فهل ما قدمه محمد صبحي على خشبة المسرح نفس السياق الذي في الرواية أو الذي قدمه غيره في السينما او على مسارح مختلفة بنفس سياق القصة..بالطبع لا
    فالرجل لوعيه الرائع لم يأخذ سياق القصة ويضعها في بيئة شرقية ويقول لنا انها بأسلوبه الخاص
    ولكن الرجل أخذ من القصة قلب الروايةروحها ( شخصية البطلة) وليست أحداثها
    أتمنى ألا أكون قد أثقلت عليكي
    تحياتي
    حسن ارابيسك

    ردحذف
  16. حسن ارابيسك
    اولا انا مش عارفه ليه كل هذا الكم من النقد
    للدرجه دي فكره بخاطرها عملت علي استفزازك الفكري
    اولا الفن ليس له مقايس بمعني ليس له قوالب وهذا ينتطبق علي الرسم
    والنحت فكل فنان له نظره خاصه به اي كل فنان له مدرسه
    ثانيا لو تتذكر فيلم امير الانتقام لانور وجدي هو اقتباس من فيلم
    كوند دي موند كريستو فكان الفيلم في جو عربي عكس النسخه الاجنبيه
    وفيلم الغريب لماجده مقتبس من فيلم ذهب مع الريح والاجواء مختلفه
    طبعا مع الفارق بين ما اكتبه وبين الاعمال العالميه هذه
    اما عن الفنان محمد صبحي فهو مدرسه تحترم بس هو انا لازم اقلده
    اشكرك علي اهتمامك في الرد ولكن انا لم اتجاهل الرد ابدا ولكن انا لاحظت تلميح اكثر من مره في التعليقات علي هذا وممكن اكون مخطئه
    تحياتي وتقدريري لك الاخ العزيز حسن ارابيسك

    ردحذف
  17. قرأت كلماتك وكأنى أستمع إلى عزف نغماته الكلمة والحرف
    ــــــــــــــ
    ملحوظة
    تم نشر مقطع الفيديو الخاص بالإهداف للأخت ليلى الصباحى هنا
    http://mhg1962.rigala.net/t260-topic

    مع خالص تقديرى واحترامى

    ردحذف
  18. الاستاذ محمد الجرايحي
    انا خجلانه جدا جدا جدا
    عارف ليه
    لاني بعجز عن التعليق علي بوستات حضرتك لاني بيقابلني دائما
    تسجيل الدخول عند المدونون العرب ومبعرفش اسجل
    ارجوا ان تخصص الرد علي المدونه العاديه لدي حضرتك
    حتي استطيع الرد
    اما عن نشر الفيديو الخاص بي فهذا كثير علي
    وجميل لا استحقه
    اشكرك اشكرك اشكرك
    واتأسف لك مليون مره

    ردحذف
  19. الاستاذ الفاضل حسن ارابيسك

    معروف ان الدراما 36 تيمة فقط اقتبست منها كل القصص و الرويات الموجودة
    موضوع قصة مستهلكة او تيمة مستهلكة لا تصلح للقول و الا لتوقفت كل قصص مولير و شكسبير التى اقتبس منها الالاف مؤلفة من المسرحيات و الافلام على مستوى العالم
    ذكرت محمد صبحى فى كارمن و لم تذكره فى هاملت مع انه فى هاملت قد اخرجها بنفس الاداء و الشخصيات الكلاسيكية
    معلش يا استاذى انا هتكلم بمفهوم شوية نقد درستهم و احترفت العمل بهم قليلا
    عندما ننقد عمل فنى فاننا ننقد العمل نفسه لا ان نضيف من عندنا فمثلا من الخطأ ان اقول اقترح ان تكون النهاية هكذا فاقتراح الناقد اولى به ان يضعه هو فى قصة من ابداعه هو
    اما هذه التيمة فلم تكن فى فيلم المرايا فقط بل فى العديد من الافلام و المسلسلات بل و الافلام الاجنبية ايضا و قد يكون تغيير المكان جديد و قد يكون الحوار جديدا و قد يكون سوء الحوار هو الجديد
    بالنسبة لبخاطرها انا وجدت روح كارولين و مفرداتها فى كل كلمة و حوار كما انك حددت الزمان و قلت حاليا بينما لم اجد اى دلالة فى القصة على الزمان فربما كانت القصة فى العشرينات او الثلايثنات ربما لماذا نتطوع و نقول القصة الان اما المكان فلم تشر له ايضا و ان استنبطنا المكان الصعيد من اللهجة
    ارجو الا اكون اطلت عليك مع الوضع فى الاعتبار استاذى ان الاختلاف فى الراى لا يفسد للود القضية

    تحياتى

    ردحذف
  20. وحشتنى مدونتك جدا
    عجبتنى فكرة بخاطرها
    وده فعلا حال بنات كتير اوى
    كمان اسلوبك ف الحوار الصعيدى جذاب جدا

    ردحذف
    الردود
    1. aya mohamed
      وانتي كمان واحشاني جدا يا آيه
      عامله ايه بعد ما اتخطفتي هههههه
      الله يخليكي علي ذوقك يا آيه
      متشكره جدا جدا جدا
      تحياتي

      حذف
  21. حلوه اوي يا كارول
    وكل شيء نصيب
    سرد رائع ومميز
    تقبلي مروري

    ردحذف
    الردود
    1. ريري كربكه
      انتي فين يا ريري مختفيه ليه
      ماتتأخريش في كتابتك لموضوعاتك يا ريري
      ميرسي يا ريري انتي اللي رائعه
      تحياتي

      حذف
  22. الأستاذ العزيز/ إبراهيم رزق
    أشكرك على تواصلك الجميل بهذا الشكل الرائع عن وعي مرجعه بعض من الدراسة
    سيدي الفاضل اسمح لي أختلف معك في بعض الجزئيات التي بدأت حضرتك بها وتفضلت
    بشأن (لايصح قول قصة مستلكة وتيمة مستهلكة)..! بل يصح وهذا مصطلح فني أقرب منه لغوي وهو مستخدم لكل من ليس في جعبته وقريحته المهنية والفكرية والفنية شئ جديد يقدمه وهنا يطلق عليه النقاد ( افلاس ) عندما يقدم لنا نفس القصة كما هي بعد استخدام لغة أخرى وملابس أخرى وبيئة مغايرة دون معالجة جديدة تماماً للفكرة تناسب البعد الزمني والمكان الجديد فهو أذن لايعرف معنى كيفية معالجة روح الفكرة ( حط ميت خط تحت روح الفكرة ) وأنا قد كتبت للأخت الفاضلة كارولين تعقيب أخر فيه مساحة اكبر لهذه النقطة قبل تعقيي عليك
    وكلامك سيدي الفاضل صحيح في جزئية ( والا توقفت كل قصص موليير وشكسبير) ولكن متى يحدث..؟ يحدث هذا عندما يقف ويتجمد ويتحجر العقل عن الإبداع في معالجة جديدة وهي على حد قولك ( اقتبس منها الالف المرات ) ولكن ليست كلها نجحت مع مقتبسيها فمنهم من لم يقدم لنا معالجة جديدة وأعتمد على سابقيه في نقل معالجة سابقة
    وأنا ذكرت محمد صبحي في كارمن لأنه المثال الصح والأدق ولم أذكر هاملت لأنها كما ذكرت حضرتك تماماً قدمت كما هي في شكلها الكلاسيكي فلم يقدم معالجة جديدة لها على الاطلاق، فهل معنى هذا انه وفق وانها نجحت لا لم تنجح.
    أما بشأن طريقة النقد فأنا لم أقل ان الناقد الفني برغم تخصصه ودراسته أن يقترح شيئاً أخر ومصطلح يقترح ده يطلق ياسيدي الفاضل لو كان متواجدا اثناء العمل فيسمى اقتراحاً وهذا بالطبع لايحدث، لكن ماتبديه انت من رأي بعد انتهاء العمل يسمى وجهة نظر فنية ناقدة عن متخصص لما كان يجب ان يكون عليه العمل والأهم من ذلك وأوضحه أن نقد العمل ياسيدي في جوانب سلبياته هو بالتأكيد يعلن على أن هناك رؤىَ أخرى كانت أصلح وأقدر لخدمة العمل الفني
    وأنت اعترفت بنفسك سيدي الفاضل ان التيمة لم تكن في فيلم المرايا فقط بل في العديد من الافلام والمسلسلات وذكرت بلسانك قد يكون المكان جديد وقد يكون الحوار جديد وقد يكون سوء الحوار هو الجديد وبذلك لم ولن يعلق عمل واحد منهم مع الجمهور لأنه اعتمد على المعالجة السابقة وفقط كل ما قدمه من جديد مكان ولهجة وحوار وبالمناسبة أنا تحدثت عن الزمان والمكان كمثال لمعالجة جديدة طبقا لتغير تركيبة وعادات وثقافة الناس فما قد يؤمن به الشخص ويعتنقه من عادات في قرية او مدينة من خمسون عاما قد لايصبح موجوداً اليوم وبناءً عليه تبني معالجة جديدة تماماً وفق هذا التغيير داخل الشخصية فهل الشخصية المصرية للفتاة بتنوعها الثقافي والجغرافي مثلا في الخمسينات هي نفس الشخصية الموجوده اليوم..؟
    وأخر نقطة ان سمحت كيف تتعرف على كاتب تقرأ له عمل لم يوضع أسمه عليه فتعرفه من اسلوبه وروحه ومفرداته..الا اذا كنت قد قرأت له تقريباً على الأقل عشره من كتبه بالحجم المتوسط
    الأستاذ الفاضل/ ابراهيم رزق
    أرجو الا أكون قد أثقلت عليك وعلى اختنا الفاضلة الكريمة صاحبة المدونة الفنانة كارولين التي بلا شك أزعجتها بهذا الصخب وأنا أعتذر منها وفي نفس الوقت اشكر تلك التدوينة ( بخاطرها ) لأنها أتاحت لنا فرصة الحوار بشكل جميل ولائق وذا هو الهدف الحقيقي من التدوين وليس الفرح بكل من يصفق ويهلل لنا على كل ما نكتبه بمجاملات زائفة لمجرد وضع توقيع رابط مدونته.
    والأن اترككم في رعاية الله
    تحياتي
    حسن أرابيسك

    ردحذف
  23. الاستاذ حسن ارابيسك

    كنت اتمنى الا اعود للموضوع مرة اخرى لكنك فتحت شهيتى للحديث
    عندما اقول افلاس فنى لا يقال على التيمة و لكن يقال على تكرار الفكر لنفس المؤلف او لنفس المبدع اما التيمة المستهلكة فانا عند رائى عندما اقول انه لا يوجد تيمة مستهلكة و لكن هناك عيوب فى العمل الفنى
    من وجهة نظرك ان محمد صبحى لم ينجح فى هاملت و من وجهة نظر اخرون ان محمد صبحى لم ينجح فى كارمن و من لسان مخرججين كبار كعبد الغنى ذكى ان هناك عيوب كثيرة فى حركة الممثليين فى المسرحيات التى يخرجها محمد صبحى
    تعلمنا ان افن وجهة نظر ما قد تراه انت سلبيا اراه انا ايجابيا و الحكم فى اولا و اخيرا للمتلقى و لكن هناك اشياء فنية فى العمل تسلط الضوء عليها و هذا هو مفهوم النقد الفنى على مستوى العالم و تابع سيادتك المجلات المتخصصة فى النقد فى العالم لن تجد كلمة سىء فى اى عمل و اتحدى
    اعود و اضرب مثال لقصة بخاطرها لاخنى المبدعة كارولين و قول سيادتك ان سن الثلاثين لم يعد سن عنوسة
    اولا ان الفكرة الاساسية ليست فى العنوسة و لكن فى تكبر بخاطرها و رفضها العرسان دون سبب منطقى
    لا اعرف هل تقصد او لم تقصد ان الاحداث تدور فى الصعيد و مازال فى الصعيد نعتبر من تخطت الخامسة و العشرون تعتبر عانسا
    اعود و اقول انها لم تذكر مكان او زمان اذا النقد فى هذه الحالة لا محل له من الاعراب

    تحياتى لك و لكلارينيت الفاروق

    ردحذف
  24. يمكن كده احسن ماكانت وافقت على حد وندمت عليه
    جميلة ياكارولين وطبيعى ان قصة زواج البنات تتناقش على مدى الزمن لانها موجودة وهتفضل قضية مهمة جدا من حق كل كاتب يشوفها بمنظوره الشخصى

    ردحذف
    الردود
    1. noha salah
      ازيك يا نهي عامله ايه
      هي فعلا قضيه هامه ولا يستطيع القلم الاكتفاء بكتابه القليل عنها
      كما هناك مواضيع اخري تشغل المجتمع ولكن ينقصها الكشف عن اسبابها
      وكيفيه علاجها
      اشكرك من كل قلبي ونظريتك اكيد صائبه
      تحياتي

      حذف
  25. اثرتى قضيه مهمه من خلال كلماتك بسيطه خفيفه تدخل قلوب القارىء من اول مره فمستحب ان نحل مشكله من خلال كلمات خفيفه وليست معقده
    اسعدكى الله كارولين
    تحياتى ابوداود

    ردحذف