2011-03-05

بعض من الفصحي و شويه بالعاميه



كنت قد كتبت في البوست السابق عنوان بأسم ( الخطأ علي من)والظاهر والله أعلم ان  


الخطأ كان علي أنا فالبعض لم يعجبه خروجي عن مسار كتابتي بالعاميه الساخره 


والبعض الآخر لم يعجبه دخول العاميه واعتبارها دخيلا غير مناسبا ولكني احب المزاح 


ليس أكثر ..ولكل شخص حريه الكتابه ولكل شخص حريه التعليق... والبعض فاجئني 


بعدم مصداقيته للنهايه واعتبارها نهايه ناقص وكلها طلبات غاليه من اشخاص غاليين 


ولكن الرهان الخاسر دائما هو ارضاء الكل في آن واحد وندمت علي كتابه 


(وسوف أغيب فتره بحثا عن الراحه )وكان من المفترض ان اكتب بحثا عن الوكسه 


القويه...آل يعني ..بحثا عن الراحه..اللي يقرأ كده يقول حجزت في منتجع خمس نجوم 


وبستجم تحت آشعه الشمس..احب اشكر ما علقوا ع البوست السابق بالترتيب حسب 


الظهور كما في الافلام(د.ريان_احمد الصعيدي _mtma89_شهرزاد_محمد محمود عماره_هبه فاروق_فاروق سحير_بكر احمد_فاروق فهمي_مدونه رحله الحياه_مصطفي سيف_yosef_محب روفائيل_الاحلام_انثي استثنائيه_ابراهيم رزق_خواطري_amiralcafe_شيرين سامي_days and nights)_همس الحنين_open book_كارمن_تخاريف متلاجمه_,ورده الجنه)


وسوف اخلط الفصحي بالعاميه لان من المستحيل استخدام الفصحي فقط في المزاح


لتكمله القصه  وعلشان كده احوليت وبعدين اخذت الطبله  و(هبا استنجلينا) طبلتوبعدين 


جائتني فكره الجزء الثاني من القصه وقولت:هي دي..ورميت الطبله من الشباك ووقعت 


علي احدي الماره وقال:اي ي ي ...قلت:مش مهم ..المهم الحق اكتبها بسرعه ..بعد ان 


شاهدت الاميره مشهد الحارس راكا يتلقي الاهانه من خادمه القصر 


وبجانبها الملك قائلا..


الملك:أرأيت بعينيك


الاميره:لأ ...معييش نضاره


الملك:(يخرج نضاره من جيبه وقال لها بعصبيه :خدي ..(وتلبس النضاره)


الاميره:الله منظر الجنينه من هنا تحفه


الملك:كيف كنت تحبين شخصا يعاني من الساديه في شخصيته ..كيف اعماك هذا ..سوف ارسله الي السجن يتعذب فيه مادام يحب التعذيب


الاميره :نعم ابي ارسله ارسله ارسله 


الملك:خلاص حارسله اتسدي


وعند سكون الليل كانت تغني الاميره اغنيه حزينه مؤثره..كانت تقول..
(مين يأمنلك مين وانت عنيك حلويين ..جايز وانت شاغلني تشغل ناس تانيين ..ماانت عنيك حلويين مين يأمنلك مين) وخرجت من غرفتها متجه الي سجن حبيبهاوقالت للحراس


الاميره:خدامين قذريين ..افتحوا الزنزانه 


(ودخلت الزنزانه وقالت):حبيبي


حبيبها:اخفضي صوتك


الاميره:لقد اشتقت اليك


حبيبها :لقد خاصم النوم عيني ولم يعاود مره اخري


الاميره :لما حبيبي


حبيبها :كان في برغوت معفن في الهدوم مطلع عيني


الاميره :حبيبي  لقد اقتربنا من النهايه ولن يستطيع احد ان يفرق بيننا 


حبيبها:لقد فعلت ما امرتيني به وجعلتيني سخريه عندما مثلت دور المريض امام والدك


الاميره:ماذا كنت افعل بعد علمي ان الملك ينوي قتلك


حبيبها:ولكن كان من الافضل ان امثل  دور العشيق دون الاهانه


الاميره:وكيف اجعلك تلمس امرأه غيري ..فعندي ان تظهر مريضا من ان تلمس غيري


حبيبها:دعينا نبدل الملابس ونكمل خطتنا 
(يخرج الحارس حبيبها مرتدي ملابس الاميره متجه الي الملك لكي يقوم بقتله تارك الاميره في الزنزانه منتظره نجاح الخطه)


الاميره :لقد غاب حبيبي عني كثيرا ولم اعلم ماذا افعل ..اني قلقه عليه..عايزه اشرب  شيشه مش عارفه افكر..ايها الحراس ياولاد الل......اخرجوني من هنا ..اخرجوني..
انا الاميره اخرجوووووووني


(يأتي حبيبها مرتدي ملابس الملك قائلا:ايه الدوشه اللي انت عملاها دي صوتك جايب للتحرير)


الاميره:حمدا لله لقد قلقت عليك والحمد لله لم يصبك شئ....اخرجني بسرعه 


حبيبها:لما 


الاميره:عايزه اهرش في ضهري ومش عارفه ..اخرجني بسرعه


حبيبها:مكانك الطبيعي هنا عزيزتي


الاميره:ماذا 


حبيبها:مكانك الطبيعي هنا لما هذا الاستغراب انت عبيطه


الاميره:ماذا تقول ايها السخيف


حبيبها:الزمي حدودك انت تتكلمين مع الملك الآن 


الاميره:وقعتك سوده الست حبيبتك


حبيبها:(ينظر لها من فوقها لتحتها باستحقار قائلا:لا ..تلك هي حبيبتي (يشار الي امرأه تدخل عليهما )


الاميره:من ...الخادمه


حبيبها :لقد تزوجنا قبل ان نأتي اليك ..اين كلمات التهاني عزيزتي


الاميره:لقد بعت الثمين بماهو ارخص وادني وفعلا استحق ذلك واكثر من ذلك


الجمهور: (يصفق)برافووووووووووووو


المذيعه:لقد رشحت القصه لثلاث مرات لجائزه الخيبه القويه وحازت ايضا علي جائزه تعاليلي يا اما
















































هناك 39 تعليقًا:

  1. يا كارولين انا هاعلق قبل ما اقرا الجزء التاني هاعلق على الكلام اللي قبل القصة
    انا لما قلتلك خرجتيني عن جو القصة لما اتكلمتي عامية في وسط الفصحى ماقلتش انك مش حرة تكتبي بالعامية
    بس انتي عايشتينا في جو درامي والقصة متكاملة وجميلة دراميا وفجاة جملة اعتراضية ماثرتش على النص بس طلعتنا عن جو القصة الرومانسي
    ودي كانت نصيحة مش اكتر

    ردحذف
  2. بعد ما قريت الجزء التاني بقى تعليقي عليه
    هنا الجزء ده جميل انتي من اول الجزء ووضح انك مزجتي العامية بالفصحى في تجانس جميل والكوميديا بالرومانسيةة بشكل مميز
    عجبني اوي الجزء ده اللي طلعت فيه روحك الفكاهية الجميلة وظهر فيه جمال قلمك الساخر
    تحياتي لابداعك

    ردحذف
  3. ياريت ياكارولبن كل كتاباتنا تبقى بالطريقة دى دا احنا كنا نعيش فى عالم تانى عالم الهتهات وابوك السقا مات وخالتى فى البيت والا لسه فى الغيط والدقيق اتعجن والا لسه بيتطحن ، لاننا نعيش فى وقت لايحتاج الى الكلكعة اللغويةوياريت ياكارولين تكتبى كمان عن حكايات الف ليلة وليلة بالطريقة الفريدة بتاعتك دى ، والله هنتمى ان تكون لياليك مليون ليلة وليلة

    ردحذف
  4. ههههههههههههههههههههههههههههههه
    انتى مشكلة اية الحلاوة دى فطست يا بنتى من الضحك مش قادرة امسك نفسى والله انتى دمك شربات درامة كوميدية سيكوباتية من باطن الحياة المدوى المهشم فى الواقع المزيف فى اللاوعى
    تحياتى لبوستك اللى زى العسل والسكر يا سكرة

    ردحذف
  5. اولا صباح الفل عليكي
    ثانيا احب اقولك اكتبي بالطريقة اللي تريحك و اللي شايفاها صح و بتخرج اللي جواكي لان صعب ترضي كل الناس المهم ترضي نفسك الاول
    ثالثا بجد القصة حلوة مش هانكر اني مستغربة جمع العامية بالفصحي بس فعلا ما ينفعش سخرية بالفصحي هايكون دمها تقيل استمري
    تحياتي يا فندم

    ردحذف
  6. كارولين غاليتي
    اغذرني ان كنت اتطفل وابدي رأيي لو سمحت لي بذلك ولك حق النشر او الحذف
    غاليتي ان ماتخطه يداك هو نابع من القلب فلا حكم للاخر عليك مادام تحومين في نطاق المعقول
    لا تنتظرين من الغير ان يسطر عليك ما تفعيل
    فما على القارئ الا ان يتقبلك كما انت وله حق الانتقاد
    اللغة ليست مهمة في التعبير المهم ان نوصل الاحساس
    فالصمت تعبير
    والنظرة تعبير
    والصرخة تعبير
    انا اشجعك على اختيارك
    واتشرف بمتابعتك لان كتابتك لها نكهة خاصة
    تحياتي

    ردحذف
  7. هههههههههههههههه
    ودمعت من الضحك
    روووووووعة
    جنااااااان
    بجد بحب كتاباتك
    لاتغيري فيها شي
    الي عايز ينتقد ينتقد
    بس لاتغيري
    بجد رووعة
    ربنا يوفقك يارب ويسعدك
    بحب ادخل مدونتك لان بضحك فيها وبنسى كل شي
    تقبلي مروري ^_^
    سلامي لاجمل كارو.

    ردحذف
  8. مصطفي سيف
    يا مصطفي انا بحب الهزار مش اكتر
    واعصابي بتتعب لما اكون جد علي طول
    وانا مش زعلانه والله

    ردحذف
  9. مصطفي سيف
    اشكرك اخي علي كلماتك المشجعه
    وميرسي واتمني فعلا انها تكون عجبتك

    ردحذف
  10. faroukfahmy
    لماذا لا تكتب عن الفكاهه
    فتعليقك لوحده يدل علي خفه ظل
    مكنونه
    اشكرك علي اطرائك لي

    ردحذف
  11. هبه فاروق
    ده من بعض ما عندك يا استاذه الكوميديا
    اشكرك من كل قلبي

    ردحذف
  12. مني ابو السعود
    صباح السكر
    اشكرك يا كاتبه وشاعره البلوجر
    وسعيده بأعجابك بالبوست ولا تحرمينا
    من تواجدك دائما

    ردحذف
  13. شهرزاد
    من حق اي شخص النقدو والله انا مش زعلانه
    ابدا انا اخذتها بضحك ولا يمكن ازعل من
    اخواتي المدونين ابدا
    وسعيده بأعجابك يا اجمل من كتبوا في الشعر

    ردحذف
  14. خواطري مع الحياه
    يعني ماغيرشي من اسلوبي طب استحملوا
    بقي انتوا احرار هههههه
    ميرسي حبيبه قلبي علي طرائك الراقي

    ردحذف
  15. جميلة جدا جدا كارولين ماشاء الله عليكى بجد فعلا فى الادب الفكاهى الساخر انا مبطلتش ضحك على الاميرة واللى عملته

    تحياتى لقلمك وانتظر منك المزيد من القصص وعاوزة اعرف الاميرة هتعمل ايه بعد كده ولا دى نهايتها

    تحياتى كارولين ولقلمك المبدع ..............

    ردحذف
  16. السلام عليكم
    كارولين
    اللى بيحاول يرضى الناس بيخسر كل حاجة لان الناس مبتجمعش على حد ابدا مهما كان فالله خالقهم لم يجتمعوا عليه وكذا الانبياء المرسلين
    اما عن البوست فأضحكنى كثيرا لما فيه من مزج جميل
    خلى بلك لحاجة من البوست دى تقع عليك
    اوعى تغيبى ولا تروحى فى اى حتة تانية

    ردحذف
  17. ورده الجنه
    انت اللي ورده جميله يا ورده المدونين
    اشكرك علي ذوقك
    لا ارجوكي دي نهايتها والله
    ده انا ما صدقت انتهت
    شكرا حبيبه قلبي

    ردحذف
  18. مدونه رحله الحياه
    صح معاك حق بس والله الموضوع
    كده اخذ اكبر من حجمه ومفيش حاجه زعلتني
    وسعيده جدا بأعجابك
    ومتخفش كله في الامان يا مان
    ومقدرش اروح في اي حته

    ردحذف
  19. ههههههههههه
    بجد ضحكت اووي اووي
    الجزء الاول مشفتوش بس هشوفه اكيد
    انا عندي رأي
    الاول انا مش بحب اسمع كلام حد
    مش مسألة عناد
    بس انا بحب اكون انا ...مش حد تاني ...لس اسلوبي
    ولا احب ان اتبع اسلوب الاخرين
    بالنسبة للفصحي والعامية ...مين اللي قال ان العامية لغة دخيلة علينا....؟
    او انها اقل شأنا ...؟؟؟!!!
    انا بستغرب فعلا
    انا اجد ان الجميع يكتب لغة وسطا بين الاثنتين
    هناك عامية جميلة جدا
    ولكن هناك من يخلط بين العامية والاسفاف للأسف
    بالعكس العامية بسيطة وجميلة وسهلة جدا
    واما الفصحي فهي حقا رائعغة ولكن يعيبنا بالطبع اخطائنا النحوية وما شابهها ...وأيضا صعوبتها بعض الشيء لأشخاص معينين
    خاصة عندما نكتب كلمة قد لا تكون متداولة
    او غريبة او بها بلاغة ...او ما شابه
    هذا غير علامات النصب والرفع و....الخ
    يا ريت تكونوا فهمتوني
    كارولين بجد انا شايفة انك معلش يعني ده مش تدخل مني بس انت غلطانة لان مش اي حد يقولك اعملي كذا تعمليه ....انت شوفي انت عايزة اية ...ولا تتشبهي بأحد
    ارجو ان تتقبلي كلماتي
    ولك مني كل الود والحب والاحترام

    ردحذف
  20. الأستاذة كارولين ، بداية أشكرك على ظهور أسمي في تترات المقدمة.
    ثانياً أنا شايف إن الأميرة تعاني من مرض نفسي اسمه " عقدة البوابين " عشان كده بتتلسع على قفاها و ترجع تاني.
    ثالثاً مقولتيش !! فيه حد نزل جاب الطبلة اللي رمتيها؟

    ردحذف
  21. الأخت العزيزة / كارولين

    أيه خفًة الدم دى ؟؟؟

    مدونة خفيفة الظل وروحها مرحة وزى العسل ... تقبلى إشتراكى ومتابعتى ... متأكد إن الأولاد مش مخلينك تتابعى غير قنوات الأطفال زيى تمام ... قفشتك من الأسلوب ... فلتذهبوا وتتركونى أيها الرفاق ... إبتعد عنى أيها الأحمق ... سأبطحك أرضا وأقضى عليك ... إلى الأمام إلى الأمام ثورة ثورة .

    الواحد دماغه باظت خلاص .

    ربنا يخليهم يارب ويتربوا فى عز أبوهم وحنان مامتهم ودمتى بكل الود

    أخوك / تامر

    ردحذف
  22. كثير من الادباء العظماء خلطو بين العامية والفصحي ولم يعتبر هذا ابدا قصور في كتاباتهم
    حقا كنت ولا زلتي رائعة
    تحياتي لك ولقلمك حبيبتي

    ردحذف
  23. هههههههههههههههههه مش قادره أبطل ضحك كارولين انتي مشكله بجد أنا سعيده انك خلطتي الخلطه الجامده دي واضح ان خفة الدم ملازماكي و أهم حاجه انك تبقي نفسك أنا كنت شكه ان القصه خلصت المره اللي فاتت بس معجبتنيش النهايه لأنها حزينه لكن المره دي عجبتني أكتر لأن الأميره كده عبيطه و تستاهل
    تحياتي ليكي يا موجه الكوميدي بالمدونات

    ردحذف
  24. re7ab .sale7
    انا معك في ان لكل واحد شخصيته ولابد ان لا يتأثر
    برأي شخص آخر بس احيانا من كثره المعزه للآخريين
    تحبي أرضائهم .دي حاجه الحاجه الثانيه الجزء الاول من
    القصه كان من المفترض مني حقيقي ان اجعلها اما بالفصحي كلهااما ان اجعلها مثل الجزء الآخر جزء بالفصحي وجزء بالعاميه ولكني ادخلت العاميه في جمله واحده فقط وسط بوست كله بالفصحي والنقد دائما ما بزعلش منه ويمكن بتعلم منه كمان
    شكرا يا رحاب يا قمر ياللي بتعجبني بوستاتك دائما

    ردحذف
  25. محمد محمود عماره
    انا مستغربه يا اخي انت مابتكتبشي
    بوستات كوميديه ليه ده انت هلكتني من الضحك
    بس حلوه عقده البوابين دي جديده

    ردحذف
  26. days and nights
    الاخ الفاضل تامر
    ده انت تشرف وتنور ..انت صاحب المدونه
    ميرسي علي ذوقك .. بس انت عرفت منين ان الاولاد
    مسيطرين علي التليفزيون علي فكره انا عملت بوست قبل
    كده اتكلمت عن الموضوع ده اسم البوست المسيطر
    وبعدين واضح ان الاولادعملوا اللي عليهم في تبويظ
    دماغنا كلنا ..وربنا يخليهم تحت ظل والديهما

    ردحذف
  27. carmen
    عجبني بوستك الاخير جدا يا كارمن الذي يتكلم
    عن الام قد ايه كنت رائعه
    وميرسي يا رقيقه علي اطرائك الراقي

    ردحذف
  28. شيرين سامي
    ذات الاسلوب السهل الممتنع
    اشكرك حبيبه قلبي منوراني
    ومبسوطه انها عجبتك و
    المهم ان النهايه مقنعه
    وميرسي علي ذوقك يا جميله

    ردحذف
  29. ماليش نصيب بقى اكون في المقدمة زي المرة اللي فاتت"حسب ترتيب الظهور"

    احلى حاجة انك تعبري باسلوبك.. و ده ميمنعش تجربة الجديد طبعا..
    القصة في كلا الحالتين حلوة جدا.. لكن المرة دي انتي ضفتي ليها عبرة جديدة.. و ان مش كل حد فعلا يستاهل.. و لازم نكون ادرى باللي بنحبه و نضحي عشانه


    تحياتي

    محمد
    :)

    ردحذف
  30. اضحك الله سنك كارولين


    :)


    رائعه استمري يا حبي

    واللي مش عجبه الطريق يغير في طريقته هو لو عاوز
    :)

    تسلمي لنا يارب

    تحياتي

    ردحذف
  31. mtma89
    انت في المقدمه علي طول يا محمد
    بمقالاتك
    وميرسي يا محمد علي تعليقك الجميل
    وشكرا

    ردحذف
  32. تخاريف مترجمه
    وليه كده بس الناس حتزعل مننا

    ميرسي يا قمر واتمني تشريفك لي دائما

    ردحذف
  33. كارولين ..
    اولا ارضاء الناس غاية لا تدرك ، علشان هيك خليك زي ماانت ، اكتبي لنفسك واكتبي عن الاشياء اللي انت بتحبيها وراح تكوني مرتاحة كثير ،، بالنسبة للبوست دمه خفيف كالعادة ..
    دمتي بخير اختي العزيزة.

    ردحذف
  34. طريقتك جميله اوى كارولين

    واتمنى تستمرى فيها لأنها بتميزك وهقرأ الجزء الاول وهكمل التعليق اوعدك

    ردحذف
  35. راى كارولين مختلف بعض الشىء
    الطموح اختى لابد ان يكون فيه بعض العناد لابد ان احاول مره وعشره فمن يكتب من تكتبيه فله الخبره ليكتب كل شىء حاولى اختى وان شاء الله سنسفق لكى فى النهايه وستنال كلماتك جوائز كثيره
    بالنسبه لاميرتنا الحبوبه لم تكن فى برج حظها فالخطاء من البدايه لانها لم تحب انسان يستاهل حبها فمروا بالطريق الخطأ هما الاثنان
    منوره دائما ومتالقه تقبلى تحياتى الاحــــــلام

    ردحذف
  36. وجع البنفسج
    راح اعمل بنصيحتك حبيبتي
    وميرسي حبيبتي علي كلماتك
    المشجعه

    ردحذف
  37. ثوره الغضب
    ميرسي علي اطرائك الراقي
    واتمني قرائتك للجزء الاول

    ردحذف
  38. مساء العطر كارولين

    وبصراحة مازالت الروعة في قلمك والتفاصيل

    وابتسمت كثيرا واضحكتني جداً بعض المقاطع

    كارولين لو نسمع لكل الناس ننجن فعلاً الخليط

    رائع بين الفصحى والعامية واصلاً هنالك كلمات

    في الفصحى مثل العامية انتِ سيدتي من تملكين

    الخيار بروائعكِ وطريقة سردك وانا ارى هنا أنكِ

    ابدعتي بالروعة ومازلت متابع لقلمكِ الراقي

    دمتم بكل ود سيدتي

    ردحذف
  39. د.ريان
    يعني مش عارفه
    اقول ايه بعد الكلام الجميل ده
    اقول ميرسي علي اطرائك ورأيك ايضا

    ردحذف