2013-01-05

حسين أفندي


 (حسين):يعني هو انا معرفشي اكتب ابدا في البيت ده يا ناس، دي حاجه بقت بزياده أوي ،انتي يا ست انتي، انتي يا ست العاقلين،هو ايه ،مافيش احساس، مافيش دم ،مافيش انسانيه،مافيش مرؤه،مافيش حاجه خالص.


هي:إيه إيه حصل إيه ،إيه الدوشه إللي انت عاملها دي كلها حصل ايه،هو كل يوم زعيق وشخيط وصريخ في وشي ،دي حاجه بأت تجنن ،حاجه بأت تطهق،حاجه بأت تجيب المروستان.

(حسين):انا!!انا اللي اطهق انا،انا اللي اجنن انا،انا إللي أأرف انا ،انا إللي أطفش انا؟

هي:شوف ياختي الراجل! انا قولت الكلام ده كله يا راجل،انت بتتلكك ولا إيه يا حسين ؟انت عايز تعملها حجه علشان تخرج زي كل مره ،ومنعرفش انت بتروح فين؟

(حسين):لاحول ولا قوه إلا بالله، إتقي ربنا يا وليه،بطلي رمي الظلم ع الناس عمال علي بطال.

هي:أُومال إيه ،طالع  من اوضتك هابب فينا زي وبور الجاز ليه ،بتزعق ليه ؟

(حسين):انتي مش سامعه صوت كاسيت ابنك  الفالح يا وليه إللي مسمع آخر الشارع ،ولا صوت بنتك الاوبرالي وهي بتصوت لأختها ،عشان ايه بتذاكرلها،ولا صوت حلللك ،اللي عمال يخبط  زي المطارق في نفوخي ،يا وليه يا وليه خللي عندك شويه دم،إتقوا ربنا فيه.

هي:يعني ايه؟ اعملك إيه؟اما غريبه والله !عمال تقولي ابنك وبنتك وديك هما وديك هنا ماتشوفلك حل معاهم،هما عيالي انا بس، ولا هو رمي المصايب كلها فوق دماغي انا بس؟

(حسين): (بسخريه)هههه ديك؟ديك وفرخه وعشه فراخ بحالها انا عايش فيها ،وماحدش واخد باله اني بكتب الروايه بتاعتي، اللي مش عايزه تبتدي من اصله،يرضي مين ده يا ربي؟

هي:يا خويا، بقالك خمسه وعشرين سنه  قاعد بتكتب في الاوضه بتاعتك بالساعات ،لا عارفين بتكتب ليه ولا لمين ولا  حد ارالك ولا حد سمع عنك  ، ولا بيجيب جنيهات عشان نقول ده جايب همه 

(حسين):يعني عايزاني ابقي موظف رايح جي علي المصلحه وبس، واسيب كتاباتي، اسيب اعز مالدي،اسيب كينونه حياتي ،انتي انسانه ماديه، انسانه مابتبوصيش غير للفلوس والجنيهات ،وإذا كان ع الشهره  يا ستي، كبار العظماء اشتهروا بعد مماتهم واتعرف مجدهم،اتعرف فنهم ،وبعدين انا بكلم مين! بكلم واحده مش قادره تفهمني من ساعه ماتجوزتها،حاتفهمني لما اكلمها عن اللي بكتبه يا ناس.

هي:يعني ايه ؟ عايز تتخانق يا حسين؟ناوي علي نكد زي كل يوم؟انا مش فضيالك؟ورايا شغل ماليش نفس للخناق ،تعبت خلاص يا ربي خلاص.

(حسين):وانا كمان مش فاضيلك،ومش آعدلك في البيت ،انا خارج  يمكن تسرتيحوا مني واستريح انا منكم.

(مشهد الكافيتريا)

(حسين):شوفلي يا بني الترابيزه بتاعه كل مره.
الجارسون:للأسف يا استاذ حسين الترابيزه مشغوله المره دي.

(حسين): يا دي الحظ ،خلاص مابدهاش، شوفلي ترابيزه، بس مطرفه شويه، عايز هدوء وحياتك.
الجارسون:اتفضل يا استاذ حسين.
(حسين):اشكرك ، ممنون ،القهوه بتاعتي من فضلك، دماغي حاتفرقع.
الجارسون: حالا.

(حسين):(يحدث نفسه)يا سلام ع الهدوء ،يا سلام علي الراحه ،الدنيا جميله بره البيت ،الدنيا حلوه اهي، مافيهاش مشاكل ،مافيهاش دوشه، ولا رزع ولا خبط ،الله يسامحك يا ام العيال، .. (يأتي الجارسون ويضع القهوه).

(حسين):أشكرك (يأخذ رشفه من القهوه ويخرج نظارته من الجاكيت ويرتديها ويفتح كشكول التدوين وينظر امامه فيأخذ نفسا لأستحضار الالهام ليكتب روايته الجديده (وفجأه يأتي رجلان يجلسان علي المنضده التي خلفه يتحدثان بصوت مسموع).

هو(المشتري):ها ..حفظت حاتقول إيه؟.
هو(السمسار): طبعا يا كبير، خلاص الموضوع حايخلص النهارده بإذن الله ،انا ظابطّه ع الآخر.
هو(المشتري): زي ما اتفقنا ،مش حادفع اكتر من 375 وانت حاتاخد زي ما اتفقنا ال30 الف بتوعك .
هو(السمسار):ماتقلقش يا كبير،هي صحيح الارض تساوي تلت تربع مليون جنيه،بس انا فاهمته انها ماتجبش اكتر من 375 ،ماتقلقش يا كبير،هي اول مره نشتغل مع بعض.
هو(المشتري):طب اسكت اسكت ،احسن اخينا جه.
(البائع):معلش يا فندم ،اتأخرت لسبب خارج عن ارادتي والله،اصل المرور واقف وعطلني وعطلكوا معايا .
هو(المشتري ):ابدا ابدا يا استاذ مدحت المهم سلامتك،ده اللي يهمنا.
(السمسار):الاوراق يا استاذ مدحت جاهزه وكله تمام ،مش ناقص بس غير التوقيعات ويبقي مبروك عليكوا ان شاء الله،اتفضلوا
الورق اهو والقلم كمان
هو(البائع):بسم الله الرحمن الرحيم ..ايه ده القلم مابيكتبش 
هو(السمسار):ولا يهمك يا استاذ تلاتين قلم علشان خاطرك..اتفضل
هو(البائع):بسم الله الرحمن الرحيم...الله ..وده كمان مابيكتبش
هو(المشتري): انت جايب اقلام مابتكتبش ولا ايه يا حدق
هو(السمسار):لا إزاي، ثانيه واحده واجيب من الاستاذ ده قلم(يشاور علي حسين)ممكن لو سمحت يا بيه قلم سعادتك 
حسين:لا... وبعدين انا مش بيه 
هو(السمسار):طب ممكن يا باشا القلم لو سمحت 
حسين:(يقف حسين)انا لا بيه ولا باشا ،ومافيش قلم، قولت ايه؟
هو(السمسار):الللللل في ايه يا استاذ، ايه البخل بتاع البني آدميين يا خونا
(حسين):انا مش بخيل يا قليل الادب ...انت اللي نصاب واونطجي
(السمسار):الللللل طب ليه الغلط ده يا فندي،انا نصبت عليك بإيه ولمؤاخذه عشان تقول نصاب

(حسين): مانصابتش عليه، بس حاتنصب ع الاستاذ المحترم، وتبيعه ارضه بتمن بخس ،ومفهمه انها ماتجابش اكتر من كده

البائع:(يقف)بتقول ايه يا استاذ ؟ وانت عرفت منين؟

هو(المشتري):(يُهدي مدحت ويشده ليجلس) يا استاذ مدحت ده راجل باين عليه مجنون مش طبيعي 

(حسين):انا سمعتك كويس، يا راجل ياللي ماعندكش ضمير انت

هو(المشتري):انت بتقول ايه انت يا راجل يااستنجلينا 

(حسين):(يذهب الي مدحت)السمسار ده قاعد مع  اللفندي ده ،بيتآمروا عليك من الصبح ،وعايزين  يستغفلوك ويشتروا منك الارض بنص تمنها وعلشان ربنا بيحبك خلاني اسمع كلامهم عشان تعرف نواياهم وضمايرهم 
(ينظر لهم مدحت بإحتقار ويرمي الورق في وشهم ويخرج من الكافيه)
(ويمسك كلا من الرجلان (حسين) في خناق وضرب وتقطيع هدوم)
سند الجرسون(حسين) ويجلسه علي ترابيزه اخري ويعطي له الليمون).
(جرسون):سلامتك يا استاذ حسين.
(حسين):الله يسلمك..خد الجاكت ده ارميه للقطط يمكن يدفيهم في الشتا ..مابقاش ينفع.
(الجارسون):حاضر يا استاذ...ااا انا حاجبلك الجاكيت اللي بروّح بيه  ،عشان ماتبردش
(يجلس حسين وهو مرتدي جاكيت الجارسون ويشرب الليمون ويأخذ نفسا عميقا ويبدأ بالكتابه ،ثم يأتي اثنان رجل وسيده ويجلسان علي الترابيزه بجانب ترابيزه حسين ويظلان صامتان لمده قصيره ثم يتحدث بينه وبين نفسه
يتبع>>>>> 


 

هناك 18 تعليقًا:

  1. ههههههههههه حسين أفندى شخصية حقيقية من لحم ودم وموجودة أنا عارفه وبشوفوا كتير موجود معانا وفى كل مكان وجوانا..... حقيقى أنا عارفه

    ردحذف
    الردود
    1. استاذنا الفاضل
      الاستاذ محمد الجرايحي
      مبسوطه كتييييييير ان اول تعليق تعليقك الكريم
      اشكرك جدا
      فعلا استاذ محمد حسين افندي لحم ودم وبيننا
      ولكن الحظ مش معاه
      اشكرك ثانيا
      تحياتي

      حذف
  2. ههههههههههههه شكل حسين أفندى حيبدع فى الحقيقه مش على الورق تحفه يا كوكى
    القصة مشوقه وخفيفة الدم وتصلح تتعمل سيت كوم فى انتظار باقى الحكاية يا قمر

    ردحذف
    الردود
    1. هبه هوبا
      ههههههه والله انا خايفه علي حسين
      لانه مظلوم يا عيني في الزمن ده
      اشكرك حبيبتي
      والفصل الثاني جاي في الطريق
      تحياتي وحبي

      حذف
  3. جميييييييييلة قصتك النهاردة كارول
    تعرفى انا اتعودت اقرأ لك انت وهبة واستاذ فاروق مع بعض ولما استاذنا غاب عنا كتير كنت اشعر ان فيه حاجة مهمة غايبة عنا
    النهاردة مع قصة استاذ فاروق وقصتك وتعليق هبة اشعر بسعادة وراحة كبيرة لاحرمنا الله تواجد الاحباب والاصدقاء الطيبين ابدا ياااااارب

    فكرة القصة مترابطة جدا وشدتنى احداثها :)
    شىء محزن ان يكون شريك حياتك لا يتفق ومفاهيمنا وما نحبه ولا يحاول ان يهيىء لنا الجو المناسب لممارسة هوايتنا

    فى انتظار البقية ان شاء الله

    (على فكرة الصورة دى لواحد اسمه ( ميشيل عفلق ) ههههه سورى الجنسية



    سلمت اختى الحبيبة وسلمت اناملك الذهبية
    تحياتى بحجم السماء

    ردحذف
    الردود
    1. ليلي الصباحي
      لولّه حبيبي
      سعيده جدا انها عجبتك وسعيده اكتر
      بعودتك وسعيد اكتر واكتر
      انك عرفتيني بشخصيه الصوره
      سلمك الله وحببك في خلقه وحبب خلقه فيك
      سلاماتي وتحياتي وتقديري

      حذف
  4. هههههههههههههههههههههههه

    فى انتظار مغامرات حسين

    تحياتى

    ردحذف
    الردود
    1. ابراهيم رزق
      امير الكوميديا
      في انتظار ايضا تعليقك علي الجزء الثاني
      بإذن الله
      تحياتي وتقديري

      حذف
  5. هههههه والله أنا أقرأ وأضحك.
    سنرى ما سيأتي به الجزء الثاني، يبدو أن المصائب تنظر حسين أفندي.. الله يستر.

    رائع ما قرأت ببساطته ولهجته السهلة التي تبعث المتعة.
    شكرا

    ردحذف
    الردود
    1. ابو حسام الدين
      اهلا اهلا اهلا بأبو حسام الدين
      وانا اقول المدونه منوره ليه
      يا سيدي انا اللي سعيده بتشريفك ليه
      اشكرك اشكرك
      وباقي القصه جايه في الطريق
      تحياتي وتقديري

      حذف
  6. كارولين الفنانة والصحفية النشطة الفذة
    لا شك ان بطل قصتك هو البطل الذي نراه دائما فى حياتنا وتشخيصك ببراعة لهذه الشحصية احسست انى بداخلها
    كما ان النماذج التى مرت بالبطل هى نماذج تحتاج الى اسلوب خاص فى التعامل
    وبطلك خرج من معركة الحب الاسرى الاسرى ههزومامدحورا
    فما اسعد من يخرج من معركة الحب الاسرى ظافرا

    ردحذف
    الردود
    1. بابا
      شوفت بقي ان وجودك فتح النفس ازاي:)
      حمد لله علي السلامه
      يهمني تعليقك لانه تاج فوق رأسي
      فهو رأي مخضرم وشرف لي ان احصل عليه
      اشكرك بقوه
      تحياتي وحبي

      حذف
  7. تعرفي يافنانة

    حسين افندي ده ورسمته علي الورق فكرني بنجيب الريحاني في ادواره

    الدنيا معانداه وطيب وحقاني

    جميل يافنانة ننتظر القادم لحسين افندي وايامه

    ردحذف
    الردود
    1. سواح خالد
      والله يا خالد تعليقك اعطاني ثقه
      وخلاني احس اني بعرف اكتب
      اشكرك جدا
      تحياتي وتقديري

      حذف
  8. :))
    حسين افندي ده لطيف جدا
    وحقااني
    واحد غيره كان قال وانا مالي
    او كان نده السمسار وساومه يايفتش سرهم يايسكتوه بفلوس
    :))

    ردحذف
    الردود
    1. شمس الشموس يا شموسه
      ههههههه
      والله فعلا كلام حضرتك مظبوط
      بس هو بقي من اصحاب الضمائر
      اشكرك علي تشريفك الراقي
      تحياتي وتقديري

      حذف
  9. هههههههههههههه
    إنتي مشكله :)

    ردحذف
    الردود
    1. شيرين شيري
      تشريفك وحضورك منور المدونه كلها
      وسعيده انها رسمت البسمه
      تحياتي وتقديري

      حذف